- वि.सं २o८१ पौष ३ बुधबार
चिसोले कष्टकर दिन बिताइरहेका एक दलित बस्तीका सर्वसाधारण र दुई विद्यालयमा अध्यनरत विद्यार्थीलाई न्यानो कपडा वितरण गरिएको छ । काठमाडौं नागार्जुन नगरपालिका– १० साबिकको स्युचाटारका समाजसेवी शिवकुमार पन्तको सहयोगमा र मुगु जिल्लामा क्रियाशील सञ्चारकर्मी नन्दबहादुर रोकायाको समन्वयमा मुगुम कार्मारोङ गाउँपालिका– ९ मा रहेको नेपाल राष्ट्रिय आधारभूत विद्यालय छायल र छायानाथ रारा नगरपालिका– १३ लापु गाउँका दलित समुदायसँगै उक्त गाउँमा रहेको नमुना आधारभूत विद्यालयमा अध्ययनरत विद्यार्थीलाई न्यानो कपडा तथा स्टेसनरी सामग्रीहरू सहयोग गरिएको हो ।
फजुर्ल खर्चको बचतले मुगु जिल्लाको एक दलित बस्ती र दुई विद्यालयमा न्यानो कपडा वितरण गरिएको पन्तले बताए । समाजसेवी शिवकुमार पन्तले मंगलबार मुगुम कार्मारोङ गाउँपालिकाका– ९ मा रहेको नेपाल राष्ट्रिय आधारभूत विद्यालय छायलमा पुगी १२८ जना विद्यार्थीलाई न्यानो कपडा वितरण गरेका छन् ।
सँगै छायानाथ रारा नगरपालिका– १३ लापुगाउँको दलित बस्तीका स्थानीय र लापुगाउँमै रहेको नमुना आधारभूत विद्यालयमा अध्ययनरत ३० जना विद्यार्थीलाई न्यानो कपडा वितरण गरेका हुन् ।
पन्तका अनुसार लापुगाउँ दलित बस्तीको पीडादायक अवस्था र चिसोबाट मुगुका विद्यार्थीमा पठनपाठनमा समस्या भएको विषय विभिन्न सञ्चारमाध्यममा आएपछि आफ्नो ध्यानाकर्षण भएको र आफूलगायत वैदेशिक रोजगारमा रहेका केही साथीको सहयोगमा विपन्न, दलित समुदाय र उनीहरूका विद्यालय जाने बालबालिकालाई न्यानो कपडा तथा स्टेसनरी सामग्री सहयोग गरिएको हाे ।
