कर्णाली याक्स दोस्रो क्वालिफायरमा, इलिमिनेटरमा चितवन २१ रनले पराजित

जयकिशन कोस्लावाला र विलियम बासिस्टोको अर्धशतक प्रेरित कर्णाली याक्सले नेपाल प्रिमियर लिग (एनपिएल)को इलिमिनेटरमा चितवन राइनोजलाई २१ रनले हराउँदै दोस्रो क्वालिफायरमा छनोट भएको छ । 

बुधबार कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको कर्णालीले निर्धारित २० ओभरमा ६ विकेट गुमाउँदै १७७ रनको लक्ष्य प्रस्तुत गरेको थियो । प्रत्युत्तरका चितवनले नाै विकेट गुमाउँदा मात्र १५४ रन बनायो । 

अब, फाइनल प्रवेशको लागि कर्णालीले आज नै हुने पहिलो क्वालिफायर्समा सुदूरपश्चिम र जनकपुरबिचको पराजित टोलीसँग खेल्नेछ । दोस्रो क्वालिफायर बिहीबार हुनेछ । 

लक्ष्य पछ्याएको चितवनको लागि इंग्ल्यान्डका पूर्वअन्तर्राष्ट्रिय खेलाडी रवि बोपराले सर्वाधिक ५३ रन बनाए । उनले ३४ बलमा तीन चौका र चार छक्का प्रहार गरेका हुन् । बोपराले एनपिएलमा तेस्रो अर्धशतक पूरा गरेका हुन् । बोपराले पोखरा र कर्णालीविरुद्ध नै अर्धशतक बनाएका हुन् । उनलाई नन्दन यादवले गुल्सन झाबाट क्याचआउट गराए । कप्तान कुशल भुर्तेलले २१ रन, ओपनर विपिन रावलले १८, लक बेन्केनस्टेइनले १६ रनको योगदान गरे  ।  

यसअघि ओपनर हसन इसाखिल एक रन बनाएर आउट भएका थिए । सन्तोष कार्कीले आठ, साहेल तनविरले नाै, अमरसिंह रौटेलाले नाै रन बनाएका थिए । रिजन ढकाल सात रन बनाए । शरद भेषवाकर १० रनमा अविजित रहे । 

कर्णालीको लागि स्पिनर जिसन मक्सुद र तीव्रगतिका बलर नन्दन यादवले समान तीन विकेट हात पारे । कप्तान सोमपाल कामीले दुई विकेट लिए । युवा स्टार विपिन शर्माको नाममा एक विकेट रह्यो । 

पहिलो इनिङमा कर्णालीका लागि जयकिशन कोस्लावाला र विलियम बासिस्टोले अर्धशतक बनाएका थिए । जयकिशनले ५३ तथा बासिस्टोले ५२ रन बनाए । चाडविक वाल्टनले ४६ रनको योगदान गरेका थिए । अन्तिम बलमा चौका प्रहार गर्न नसक्दा वाल्टन आफ्नो पहिलो अर्धशतक बनाउनबाट चुके । वाल्टनले २३ बलमा चार चौका र तीन छक्कासहित ४६ रन बनाएका हुन् । 

पहिलो खेल खेलिरहेका ओपनर जयकिशनले ३९ बलमा ६ चौका र २ छक्कासहित सर्वाधिक ५३ रन बनाए । यसअघि जयकिशनले ३६ बलमा ६ चौका र दुई छक्कासहित अर्धशतक बनाएका हुन् । उनले ११.३ ओभरमा अर्धशतक बनाउँदा कर्णालीले दुई विकेट गुमाएर  ८६ रन बनाएको थियो । तेस्रो विकेटका लागि जयकिशनले अस्ट्रेलिया यू–१९ टिमका पूर्वकप्तान विलियम बासिस्टोसँग ५९ रनको साझेदारी पनि गरेका थिए । ४.६ ओभरमा कर्णालीले ३५ रन बनाउँदा दोस्रो विकेटको रूपमा जिसन मक्सुद आउट भएका थिए । 

बासिस्टोले ३९ बलमा तीन चौका र दुई छक्का बनाएका हुन् । उनले सोहल तनविरबाट बोल्ट हुनुअघि ३७ बलमा अर्धशतक बनाए । ३१ वर्षीय अस्ट्रेलियन खेलाडीले विराटनगर किंग्सविरुद्ध पनि ६६ रन बनाएका थिए । 

यसअघि भारतीय चर्चित खेलाडी शिखर धवनले कर्णाली याक्सका लागि चार खेल खेलेर घर फर्किएका थिए । उनको स्थानमा जयकिशनलाई कर्णाली याक्सले मंगलबार राति मात्रै टिममा समावेश गरेको हो । 

एनपिएलमा पहिलो खेल खेलेका भारतीय जयकिशन कोस्लावालालाई कर्णालीले ऋत गौतमसँगै ओपनिङमा पठाएको थियो । ३५ वर्षीय गुजराती खेलाडीले यसअघि सन् २०१८ मा ललितपुर प्याट्रिओट्सका लागि इपिएल उपाधि जिताएका थिए । फाइनलमा ५७ रन बनाएका थिए । एनपिएलमा बनेको यो २३औँ अर्धशतक हो । यसअघि लिग चरणमा एक शतकसहित २२ अर्धशतक बनेका थिए । कर्णालीका २३ वर्षीय ओपनर ऋत गौतम दोस्रो खेलमा पनि गोल्डेन डकआउट भए । यसअघि पहिलोपटक सुदूरपश्चिमविरुद्ध पनि उनी गोल्डेन डकआउट भएका थिए । 

तेस्रो नम्बर क्रिजमा आएका जिसन मक्सुदले १२ बलमा समान एक चौका र एक छक्कासहित १४ रनको योगदान गरेका थिए । उनलाई शरद भेषवाकरले रञ्जित कुमारले क्याच आउट गराएका हुन् । आशा गरिएका गुल्सन झा तीन बल खेलेर डक आउट भएका हुन् । तीन रन बनाएका देव खनाल पनि रनआउट भएका थिए । 

चितवनका लागि सोहेल तनविरले दुई तथा शरद भेषवाकर, रवि बोपरा र कुशल मल्लले समान एक विकेट हात पारे । लिग चरणमा कर्णालीले याक्सले चितवनलाई ६ विकेटले हराएको थियो । यसअघि चितवन लिग चरणमा तेस्रो र कर्णाली चौथो हुँदै इलिमिनेटरमा छनोट भएका थिए । काठमाडौं, लुम्बिनी, विराटनगर र पोखरा भने लिग चरणबाटै बाहिरिएका हुन् ।