मकवानपुरको बकैयास्थित बुद्ध माविका प्रअ लामामाथि गोली प्रहार

मकवानपुरको बकैया गाउँपालिकाको हात्तीसुँडेमा रहेको बुद्ध माविका प्रधानाध्यापकमाथि गोली प्रहार भएको छ। जिल्लाको बागमती गाउँपालिका वडा नम्बर १ बोटगाउँका प्रेमबहादुर बोम्जनमाथि आइतबार दिउँसो गोली प्रहार भएको हो। उनको दाहिने गालामा गोली लागेको छ। 

मकवानपुरको बागमतीबाट प्रदेश २–००३–००६ प ८४५४ नम्बरको मोटरसाइकलमा सिन्धुलीतर्फ जाँदैगर्दा बोम्जनमाथि धरान-चतरा सडकखण्डअन्तर्गत सिन्धुलीको हरिहरपुरगढी गाउँपालिका वडा नम्बर ६ मा गोली प्रहार भएको सिन्धुलीका प्रहरी प्रवक्ता प्रहरी नायब उपरीक्षक अनिलकुमार खड्काले जानकारी दिए।

बोम्जनलाई तीनजनाको समूहमा आएका व्यक्तिले गोली प्रहार गरेका थिए। मोटरसाइकलमा प्रअ बोम्जनसँगै उनका भाइसमेत रहेको र उनलाई भने केही पनि नभएको प्रवक्ता खड्काले बताए। प्रअ बोम्जनलाई प्राथमिक उपचारपछि वीरगन्ज पठाइएको र गोली प्रहार गर्नेको खोजीकार्य भइरहेको उनले जानकारी  दिए।