कल सेन्टरको नाममा अवैध धन्दा गरी सर्वसाधारणलाई ठगेको गुनासो बढिरहेका वेला प्रहरीले एकपछि अर्को कल सेन्टरमा छापा हानिरहेको छ ।
यसक्रममा प्रहरीले बुधबार काठमाडौंको ठमेलस्थित ज्याठामा रहेको कल सेन्टरमा छापा हान्यो । त्यहाँबाट प्रहरीले चार चिनियाँ नागरिक पक्राउ गरेको काठमाडौं प्रहरी परिसरका एसपी दिनेशराज मैनालीले जानकारी दिए ।
प्रहरीले पक्राउ परेकोको पहिचान खुलाएको छैन । तर, सबै पुरुष भएको जनाएको छ । त्यहाँबाट प्रहरीले ठूलो परिमाणमा मोबाइल सेल फोन, ल्यापटप नियन्त्रणमा लिई अनुसन्धानअगाडि बढाएको छ ।
तीन दिनअघि रुपन्देहीमा रहेको एक कल सेन्टरमा छापा हानेपछि भोलिपल्टै प्रहरीले काठमाडौं तीनकुनेस्थित स्काइ वर्ल्ड सर्भिसमा छापा हानेको थियो । रुपन्देहीमा छापा हान्दा एक भारतीय पक्राउ परेका थिए । उनले आफ्नो मालिक दुई चिनियाँ नागरिक रहेको बताएका थिए । भोलिपल्ट तीनकुनेबाट प्रहरीले एक चिनियाँ नागरिकसहित तीन दर्जनकाे संख्यामा पक्राउ गरेको थियो ।
