नेपाल क्लियरिङ हाउसले सञ्चालन गर्दै आएको एनसिएचएल ब्यांक सेन्ट्रल तथा कर्पोरेट पे प्रणालीमार्फत गरिने राजस्व भुक्तानीसम्बन्धी अन–अस (पठाउने र पाउने बैंक–वित्तीय संस्था एउटै रहेको खण्डमा) भुक्तानीको प्रतिकारोबार सीमा बढाएको छ । कम्पनीले अधिकतम दुई अर्बसम्मको राजस्व डिजिटल माध्यमबाट भुक्तानी गर्न मिल्ने व्यवस्था गरेको हो ।
यसअघि कम्पनीले विभिन्न सरकारी निकाय तथा बैंक वित्तीय संस्थाको समन्वय एवं नेपाल राष्ट्र बैंकको स्वीकृतिपश्चात् कारोबार सीमा बढाएको थियो । अब बैंक–वित्तीय संस्थाका ग्राहकहरूले राजस्व भुक्तानी गर्दा एनसिएचएल बैंक सेन्ट्रलमार्फत अन–असमा दुई अर्ब रुपैयाँसम्म र कर्पोरेट पेमार्फत पब्लिक नेटवर्कबाट अन–असमा एक करोड रुपैयाँ तथा प्राइभेट नेटवर्कबाट अन–असमा पाँच करोड रुपैयाँसम्म गर्न सक्ने जनाइएको छ । वृद्धि गरिएको प्रतिकारोबार सीमा पठाउने र पाउने बैंक–वित्तीय संस्था एउटै रहेको खण्डमा लागू हुने तथा पाउने र पठाउने बैंक–वित्तीय संस्था फरक रहेको खण्डमा हाल कायम रहेको ननरियल टाइम भुक्तानी ३० करोड रुपैयाँसम्म र रियल टाइम भुक्तानी २० लाख रुपैयाँसम्म नै लागू हुने कम्पनीले जनाएको छ ।
थप गरिएको कारोबार सीमाले सरकारको डिजिटल माध्यमबाट राजस्व संकलन गर्ने पहललाई थप टेवा पुग्ने कम्पनीले अपेक्षा गरेको छ । विशेषतः अन्तरिक राजस्व विभाग, भन्सार विभागजस्ता ठूला रकम भुक्तानी गर्नुपर्ने निकायका लागि यो सुविधा थप प्रभावकारी हुने जनाइएको छ । एनसिएचएलले हाल कनेक्ट आइपिएस, कर्पोरेट पे, बैंक सेन्ट्रलका साथै विभिन्न सदस्य बैंक वित्तीय संस्थाको मोबाइल बैंकिङ तथा विभिन्न मोबाइल वालेटमार्फत पनि सरकारी राजस्व संकलन गर्ने सेवा विस्तार गर्दै आएको थियो । चालू आर्थिक वर्षको फागुन महिनाको मध्यसम्म एनसिएचएलमार्फत ३४ अर्ब रुपैयाँबराबरको राजस्व संकलन भइसकेको कम्पनीले जनाएको छ ।
