म्याग्दीको बेनीस्थित बालगृहका अनाथ बालबालिकाले सामूहिक रूपमा भाइटीका लगाएका छन्। नेपाल बाल संगठन म्याग्दीले सञ्चालन गरेको सो बालगृहका बालबालिकाले एक–आपसमा टीका र माला लगाएर भाइटीका पर्व मनाएका हुन्। अष्ट्रेलियामा रहेका म्याग्दीका छोरीबुहारीले स्थापना गरेको ‘उई केयर एन्ड लभ’ संस्थाले बालगृहमा सामूहिक भाइटीका कार्यक्रमको आयोजना गरेको हो।
बालगृहका बालबालिकालाई तिहार निरस नबनोस् भनेर सामूहिक भाइटीका कार्यक्रमका लागि सहयोग गरिएको उई केयर एन्ड लभ संस्थाका प्रतिनिधि उपेन्द्र गिरीले बताए। म्याग्दी बालगृहमा हाल ११ बालबालिका आश्रित छन्। अभिभावकविहीन बालबालिकालाई बालगृहले आश्रयका साथै माध्यमिक तहसम्मको पठनपाठनको व्यवस्था मिलाएको छ।
नेपाल बाल संगठन म्याग्दीका अध्यक्ष राजेश शाक्यले बालगृहमा सामूहिक भाइटीका आयोजना गर्न पूजासामग्री, मिठाईलगायत खानाका परिकारको व्यवस्था गर्ने उई केयर एन्ड लभ संस्थामा आबद्ध चेलीहरूलाई धन्यवाद दिए। रासस
