नेपाल सुनचाँदी व्यवसायी महासंघकोे सातौँ तथा आठौँ वार्षिक साधारणसभा एवं तेस्रो महाधिवेशनले महासंघका वरिष्ठ उपाध्यक्ष माणिकरत्न शाक्यलाई सर्वसम्मत रूपमा अध्यक्षमा चयन गरेको छ । महासंघका अध्यक्ष मोहन सुनारको सभापतित्वमा भएको कार्यक्रमले शाक्यलाई अध्यक्ष चयन गरेको हो ।
साधारणसभाबाट वरिष्ठ उपाध्यक्षमा अर्जुन रसाइली, उपाध्यक्षहरूमा मोहनकाजी शाक्य, दियेशरत्न शाक्य र विपिन रामुदामु निर्वाचित भएको महासंघले जनाएको छ । एसोसिएट्स उपाध्यक्षमा पवन सोमानी, महासचिवमा धर्मसुन्दर बज्राचार्य, कोषाध्यक्षमा सुदीप श्रेष्ठ, सचिवद्वयमा किरणभाइ बज्राचार्य र बाबुराम विश्वकर्मा निर्वाचित भएको जनाइएको छ ।
महासंघको प्रवक्तामा मनोजकुमार शाह र सहकोषाध्यक्षमा पद्मसुन्दर शाक्य निर्वाचित भएको महासंघले जनाएको छ । महासंघको विधानमा ५५ सदस्यीय कार्यसमिति रहने व्यवस्था भएअनुरूप सबै पदमा निर्विरोध भएको जनाइएको छ ।
साधारणसभाले विधान संशोधन गरी केही नयाँ पद सिर्जना गरी त्यसमा विभिन्न व्यक्तिहरूलाई चयन गर्ने निर्णय गरेको जनाइएको छ । जसअनुसार प्रस्तावित उपाध्यक्षहरूमा शिव सर्राफ, निर्मल विश्वकर्मा, दुर्गाबहादुर सुनार, महेन्द्ररत्न शाक्य, जोगलाल विश्वकर्मा र भरत अग्रवाल रहेका छन् ।
प्रस्तावित सचिवमा केशबहादुर सुनार तथा प्रस्तावित सहकोषाध्यक्षमा रमेश रसाइली रहेका छन् । नयाँ व्यवस्थाअनुरूप अब महासंघमा ७७ जनाको कार्यसमिति रहने जनाइएको छ ।
