सांसद रामनारायण बिडारीले प्रतिनिधिसभा विघटनबारे संविधान बनाउँदा भएको छलफलको रेकर्ड राष्ट्रिय सभामा बजाउन माग गरेका छन् ।
आज राष्ट्रिय सभामा उनले भने, ‘सविंधान मस्यौदा गर्दा समितिले कार्यदल बनाएको थियो १५ जनाको । म पनि एक सदस्य थिएँ । विज्ञ टिम बनाइएको थियो, तत्कालीन माननीय कृष्ण सिटौलाको अध्यक्षतामा, त्यो पाँचजनाको टिममा पनि म थिएँ । केपी ओली बारम्बार त्यहाँ आउनुहुन्थ्यो । सुवास नेम्वाङ त्यो वेलाको अध्यक्ष हुनुहुन्थ्यो । त्यहाँ भएको कुराको टेप रेकर्डलाई यो सदनमा बजाइयोस् । अनि हामीले कति नालायक काम गरेछौँ भन्ने कुरा त्यहाँबाट स्पष्ट हुन्छ । लामो समय लगाएर धारा ७६ र १०० लाई देश र विदेशका समेत विज्ञहरूसँग परामर्श गरेर के गर्याे भने प्रतिनिधसभा प्रधानमन्त्रीको सनकमा भंग हुन सक्दैन भन्ने कुरा निर्क्याेल गर्नका निम्ति जानेसम्मको भाषा त्यहाँ लेखिएको छ ।’
