नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङले बुद्धको जन्मस्थल लुम्बिनीमा ‘महासिद्ध सेन्चुरी फर युनिभर्सल पिस’ केन्द्र निर्माण अभियानमा ऐक्यबद्धता जनाएका छन् । नेपालमा एक रुपैयाँ र अन्यत्र एक अमेरिकी डलर दान अभियान चलाएर केन्द्रकाे संरचना निर्माण गर्न सुरु गरिएको छ ।
लुम्बिनीमा बुधबार भएको कार्यक्रममा घिसिङले केन्द्रका परिकल्पनाकार श्यालपा तेन्जिङ रिन्पोचेलाई एक रुपैयाँ दान दिएर अभियानमा ऐक्यबद्धता जनाएका हुन् । घिसिङले केन्द्रको स्थापना विश्वशान्तिका लागि महत्वपूर्ण भएकाले निर्माणमा अपनत्व लिएर आ–आफ्नो क्षेत्रबाट सहयोग गर्न आग्रह गरे ।
कार्यक्रममा रिन्पोचेले सबैको सहभागिता र अपनत्व हुने गरी अभियानमार्फत केन्द्रको स्थापना गरेर लुम्बिनीलाई विश्वशान्तिको मुहान बनाउन लागिएको बताए । अभियान गत कात्तिकमा सुरु गरिएको थियो ।
युनिभर्सल पिस केन्द्रमा दुई हजारभन्दा बढी क्षमताको अन्तर्राष्ट्रियस्तरको सभाकक्ष, शान्तिवार्ता र ध्यान कक्ष, पुस्तकालय र संग्रहालय हुनेछन् । विभिन्न मुलुकका शाेधकर्ताहरू रहने खोज अनुसन्धान केन्द्र रहनेछ । जसले प्राचीन र आनुधिक भाषामा लेखिएका बौद्ध धर्मसम्बन्धी पुस्तकहरूको संकलन, चर्चा, व्याख्या गर्नेछन् ।
जर्मन आर्किटेक्टले डिजाइन गरेको कमलको फूल आकारमा बनाउन लागिएको केन्द्र तीन वर्षभित्र निर्माण पूरा गर्ने लक्ष्य छ ।
