नेपाली कम्युनिस्ट पार्टी (नेकपा)ले भोटेकोशी हुँदै त्रिशूली नदीमा आएको बाढीबाट प्रभावितहरूको सहयोगार्थ प्रधानमन्त्री राहत कोषमा २५ लाख रुपैयाँ जम्मा गरेको छ।
पार्टीका प्रवक्ता प्रकाश ज्वालाका अनुसार पार्टीको निर्णयबमोजिम बाढीपीडितहरूलाई सहयोग पुर्याउन बिहीबार उक्त रकम जम्मा गरिएको हो। पार्टीले भोटेकोशी बाढीका सन्दर्भमा खोजी, उद्धार, राहत र पुनर्स्थापनाका काममा सिंगो पार्टीपंक्तिलाई परिचालन गरेको छ।
बाढीपीडितहरूको उद्धार तथा राहत कार्यमा हर किसिमको सहयोग, समन्वय र सहकार्यका लागि पार्टी केन्द्रीय कार्यालय पेरिसडाँडामा ‘विपत् व्यवस्थापन डेस्क’ स्थापना गरिएको छ। उक्त डेस्कमार्फत बाढीपीडित वा उनीहरूका परिवार, आफन्तसँग सम्पर्क गर्न तथा सूचना उपलब्ध गराउन अपिल गरिएको छ।
नेकपाले जनताको जीवन रक्षा र विपत् व्यवस्थापनलाई प्राथमिकता दिँदै राज्यसँगको समन्वयमा राहत तथा पुनर्स्थापना कार्यलाई प्रभावकारी बनाउनेसमेत प्रतिबद्धता जनाएको छ।
