सरकारले चालू आर्थिक वर्षको पहिलो महिना साउनमा २३ अर्ब २९ करोड ८० लाख रुपैयाँ सार्वजनिक ऋण उठाएको छ । साउनमा सरकारले २० अर्ब आन्तरिक र तीन अर्ब २९ करोड ८० लाख रुपैयाँबराबर वैदेशिक ऋण परिचालन गरेको हो ।
सार्वजनिक ऋण व्यवस्थापन कार्यालयका अनुसार साउनमा ऋण परिचालनको तुलनामा सरकारले तीन अर्बले कमी हुने गरी २० अर्ब ६ करोड ७५ लाख रुपैयाँ ऋण भुक्तानी गरेको छ । यस अवधिमा सरकारले १७ अर्ब ९१ करोड ४० लाख आन्तरिक र दुई अर्ब १५ करोड ३५ लाख रुपैयाँबराबर बाह्य ऋणको साँवा भुक्तानी गरेको हो । यससँगै सरकारले तिर्न बाँकी सार्वजनिक ऋण २९ खर्ब ७६ अर्ब ३३ करोड ७४ लाख रुपैयाँ पुगेको छ । यो नेपालको कुल गार्हस्थ्य उत्पादन (जिडिपी)को तुलनामा ४५.१० प्रतिशत हो ।
चालू आर्थिक वर्षको पहिलो महिनामा विनिमय दरमा भएको परिवर्तनले सरकारलाई आठ अर्ब ५८ करोड १७ लाख रुपैयाँ नाफा भएको छ । विनिमय लाभले गर्दा साँवा भुक्तानीको तुलनामा ऋण परिचालन गर्दासमेत तिर्न बाँकी ऋण अझ घटेको हो । गत आर्थिक वर्षको अन्तिम अर्थात् असार मसान्तसम्ममा तिर्न बाँकी ऋण २९ खर्ब ८१ अर्ब ६८ करोड ८६ लाख रुपैयाँबराबर थियो । साउन महिनामा भुक्तानीको तुलनामा ऋण परिचालन तीन अर्बले बढी देखिएको भए पनि आठ अर्ब विनिमय लाभ हुन पुग्यो । यसले गर्दा असारको तुलनमाा साउन मसान्तसम्ममा आइपुग्दा तिर्न बाँकी ऋण पाँच अर्ब ३५ करोडले कमी हुन पुगेको हो ।
ब्याजमा भयो पौने ६ अर्ब खर्च
साउन महिनामा सरकारले ऋण सेवामा कुल २४ अर्ब ९९ करोड ६१ लाख रुपैयाँ खर्च गरेको छ । यसमध्ये ब्याजमा मात्रै ६ अर्ब ८४ करोड २६ लाख रुपैयाँ खर्च भएको हो । यस अवधिमा सरकारले आन्तरिकतर्फ पाँच अर्ब ३४ करोड दुई लाख र बाह्यतर्फ ५० करोड २४ लाख रुपैयाँबराबरको ब्याज भुक्तानी गरिएको कार्यालयको तथ्यांक छ । सरकारले साउनमा ऋण सेवामा गरेको कुल खर्च जिडिपीको ०.३८ प्रतिशतबराबर हो ।
सरकारले चालू आवमा कुल ६ खर्ब ५८ अर्ब २८ करोड रुपैयाँ ऋण परिचालन गर्ने लक्ष्य लिएको छ । साउनमा परिचालन गरिएका सार्वजनिक ऋण वार्षिक लक्ष्यको ३.५४ प्रतिशत हो । त्यस्तै, चालू आवमा ऋणको साँवा ब्याज भुक्तानीका लागि सरकारले चार खर्ब १७ अर्ब ८८ करोड बजेट विनियोजन गरेको छ । साउनमा ऋण सेवामा भएको खर्च वार्षिक विनियोजनको ५.९८ प्रतिशत हो ।
