डिभिजन वन कार्यालय गाईघाटमा कार्यरत वन अधिकृत भुवन पौडेल १६ हजार २५० रुपैयाँ घुससहित पक्राउ परेका छन्।
अख्तियार दुरुपयोग अनुसन्धान आयोगको कार्यालय इटहरीबाट खटिएको टोलीले कार्यालयका सातौँ तहका वन अधिकृत तथा सूचना अधिकारी पौडेललाई बिहीबार नगद १६ हजार २५० रुपैयाँसहित पक्राउ गरेको हो।
विशेष सूचनाका आधारमा खटिएको अख्तियारको टोलीले कार्यालयमै निगरानी गरी पौडेललाई एक सामुदायिक वन उपभोक्ता समूहबाट लिएको रकमसहित नियन्त्रणमा लिएको जिल्ला प्रशासन कार्यालय उदयपुरले जनाएको छ।
उदयपुरका प्रमुख जिल्ला अधिकारी मेखबहादुर मंग्रातीले अख्तियारको टोलीले पौडेललाई नगदसहित पक्राउ गरेको जानकारी प्राप्त भएको बताए।
पौडेलले सामुदायिक वन उपभोक्ता समूहसँग सम्बन्धित काम सहज रूपमा गराइदिने भन्दै रकम मागेको आरोप छ। यद्यपि, रकम दिने सामुदायिक वन उपभोक्ता समूहको नाम र ठेगाना भने खुलाइएको छैन।
अख्तियारले घटनासँग सम्बन्धित थप प्रमाण संकलन गरी आवश्यक अनुसन्धान अघि बढाउने जनाएको छ। पक्राउ परेका पौडेलमाथिको आरोप अनुसन्धान तथा कानुनी प्रक्रियाबाट थप स्पष्ट हुने जनाइएको छ।
डिभिजन वन कार्यालय गाईघाटका केही कर्मचारीले सेवाग्राही तथा उपभोक्ता समूहसँग काम सहज बनाइदिने बहानामा रकम माग्ने गरेको गुनासो आउने गरेको बताइएको छ। वनसम्बन्धी काममा अनावश्यक झन्झट सिर्जना गरी रकम असुल्ने गरेको आरोपसमेत सेवाग्राहीबाट आउने गरेको जनाइएको छ।
वन अधिकृत पौडेल घुससहित पक्राउ परेपछि डिभिजन वन कार्यालय गाईघाटको सेवाप्रवाह र कर्मचारीको कार्यशैलीमाथि समेत प्रश्न उठेको छ।
