सुदूरपश्चिम प्रदेश सरकारले प्रदेशमातहतका चारवटा अस्पताललाई सहिद दशरथ चन्द स्वास्थ्य विज्ञान विश्वविद्यालयको शिक्षण अस्पतालको रूपमा प्रयोग गर्न स्वीकृति दिने निर्णय गरेको छ । बिहीबार बसेको मन्त्रिपरिषद् बैठकले कैलालीको धनगढीस्थित सेती प्रादेशिक अस्पताल, लम्की प्रादेशिक अस्पताल र टीकापुर अस्पताल तथा कञ्चनपुरको महाकाली प्रादेशिक अस्पताललाई शिक्षण अस्पतालको रूपमा प्रयोग गर्न दिने निर्णय गरेको हो ।
विश्वविद्यालयमा शैक्षिक कार्यक्रम सञ्चालनको प्रक्रियाका लागि यस्तो निर्णय गरिएको मुख्यमन्त्री तथा मन्त्रिपरिषद्को कार्यालयले जनाएको छ । सञ्चालनको क्रममा रहेको कैलालीको गेटास्थित सहिद दशरथ चन्द विश्वविद्यालयले यसै शैक्षिक सत्रबाट चिकित्सा शिक्षाको पठनपाठन सुरु गर्ने तयारी गरेको छ ।
चिकित्सा शिक्षा आयोगको मापदण्डअनुसार चिकित्सा शिक्षाको पठनपाठन सुरु गर्न तीन सय शय्याको शिक्षण अस्पताल तीन वर्ष सञ्चालन भएको हुनुपर्छ । सोही मापदण्ड पूरा गर्न अहिले प्रदेशका अस्पताललाई शिक्षण अस्पतालको रूपमा प्रयोग गर्न खोजिएको विश्वविद्यालयले जनाएको छ ।
गेटामा अहिले ५० शय्यामा अस्पताल सञ्चालनमा छ । सेती, महाकाली र लम्कीचुहा ५०–५० शय्या तथा टीकापुर अस्पताल ५१ शय्या सञ्चालनको स्वीकृत दरबन्दी छ । सेतीमा अस्पताल विकास समितितर्फ थप ७५ शय्या र महाकालीमा ५० शय्या सञ्चालन भइरहेको छ ।
यसै आर्थिक वर्षमा तीन सय शय्याको अस्पताल सञ्चालन गर्ने विश्वविद्यालयको योजना छ । त्यसका लागि सरकारले विश्वविद्यालयलाई यस वर्ष साढे दुई अर्बभन्दा बढी बजेट विनियोजन गरेको छ । ‘विश्वविद्यालयको शैक्षिक कार्यक्रम सञ्चालनको मापदण्ड पुगोस् भनेर शिक्षण अस्पतालको रूपमा प्रयोग गर्न दिने निर्णय गरेका हौँ,’ प्रदेशका आर्थिक मामिलामन्त्री विक्रमसिंह धामीले भने । सम्बन्धित निकायसँग आवश्यक सम्झौता गर्ने तथा कानुनी र प्रशासनिक प्रक्रिया अगाडि बढाउने निर्णय बैठकले गरेको उनले जानकारी दिए ।
गेटामा यसै शैक्षिक सत्रबाट १२० जना विद्यार्थीका लागि एमबिबिएस, बिएससी नर्सिङ, बी अप्टोमेट्री र बिएस्सी एमएलटीको पठनपाठन सुरु गर्ने तयारी छ । त्यसका लागि शैक्षिक तथा प्रशासनिक जनशक्ति व्यवस्थापनको काम भइरहेको विश्वविद्यालयले जनाएको छ ।
विश्वविद्यालयले चारजना प्राध्यापक र १३ जना सहप्राध्यापक छनोट गरिसकेको छ भने थप ६० जना सहायक प्राध्यापक छनोटको प्रक्रिया भइरहेको छ ।
विश्वविद्यालयका उपकुलपति प्रा.डा. सुनीलकुमार जोशीले चिकित्सा शिक्षा पठनपाठन र शिक्षण अस्पताल सञ्चालनको तयारी सँगसँगै अगाडि बढिरहेको बताएका छन् । उनले छिट्टै तीन सय शय्यामा शिक्षण अस्पताल सञ्चालनमा ल्याउन लागिएको जानकारी दिए । डा. जोशीका अनुसार अस्पतालको शय्या व्यवस्थापनका लागि धनगढीको होल्डिङ सेन्टरमा प्रयोगविहीन ‘बेड’ ल्याउन प्रक्रिया अगाडि बढाइएको छ ।
