ललितपुर महानगरपालिकाले डिजिटल जरिवाना व्यवस्थापन प्रणाली ‘एलएमसी ई-चलान’ सञ्चालनमा ल्याएको छ।
सोमबारदेखि नै सञ्चालनमा ल्याइएको यस प्रणालीले अनधिकृत पार्किङ जरिवानादेखि महानगरसँग सम्बन्धित सबै जरिवाना तिर्न सहज हुनेछ । सवारीसाधन चलाउँदा गल्ती गरेकाहरूले तुरुन्तै क्युआरमार्फत जरिवाना शुल्क तिर्न सक्नेछन्। उक्त क्युआर नगर प्रहरीले प्रदान गर्नेछ ।
यसअघि जरिवाना भुक्तानी तिर्न बैंक तथा कार्यालयमै जानुपर्ने अवस्था थियो । तर, अब जहाँ जरिवानामा परियो त्यहीँबाट जरिवाना बुझाउन सकिनेछ ।
महानगरका मेयर चिरिबाबु महर्जनले सेवा प्रवाहलाई सहज र प्रविधियुक्त बनाउन डिजिटल जरिवाना तिर्न मिल्ने सिस्टम लागू गरिएको बताए। उनका अनुसार अनधिकृत पार्किङ, जथाभावी फोहोर फालेमा, अनुमतिविना खुला क्षेत्रमा आगो बालेमा, महानगरभित्र रहेका बगैँचा, फूल र बिरुवाहरूमा क्षति पुर्याएमा लगायत महानगरपालिकाले तिराएको जरिवाना शुल्क क्युआरबाट गर्न सकिनेछ ।
