विराट मेडिकल कलेज टिचिङ हस्पिटलले नेपालमै पहिलोपटक एआई प्रविधिको अल्ट्रासाउन्ड मेसिन सञ्चालनमा ल्याएको छ ।
मोरङको बुढीगंगा गाउँपालिका– २ स्थित टंकीमा रहेको विराट शिक्षण अस्पतालको दाबीअनुसार आर्टिफिसियल इन्टेलिजेन्स सक्षम (जिई युएसजी ) अल्ट्रासाउन्ड मेसिन नेपालमै पहिलोपटक सञ्चालनमा आएको हो ।
अब कोशी प्रदेशका बिरामीले अत्याधुनिक डायग्नोस्टिक सेवा आफ्नै सहरमा सर्वसुलभ रूपमा पाउने अस्पताल प्रशासनले जनाएको छ ।
अस्पतालका प्रशासन प्रमुख प्रमेशराज देवकोटाले एआई प्रविधिको यो मेसिनले परम्परागत अल्ट्रासाउन्डको तुलनामा शरीरका भित्री अंगहरूको तस्बिर अत्यन्तै सूक्ष्म र स्पष्ट रूपमा प्रदर्शन गर्छ । यसमा रहेका सूक्ष्म उपकरणहरूले अंगहरूको बनावट स्वतः पहिचान गरी स्वचालित रूपमा नाप लिने गर्दछन् ।
जसले मानवीय त्रुटिको सम्भावनालाई कम गरेर भरपर्दो रिपोर्ट प्रदान गर्ने हस्पिटलको भनाइ छ । एआई प्रविधिका कारण शरीरको आन्तरिक जाँच प्रक्रिया ४० प्रतिशतसम्म छिटो हुन्छ । चिकित्सकहरूलाई उपचारको सही निर्णय लिन सहज बनाउँछ ।
