नेपाली कम्युनिस्ट पार्टीको स्थानीय तहका जनप्रतिनिधिको दुईदिने भेला राजधानीमा सुरु भएको छ । प्रज्ञा भवन कमलादीमा बुधबार सुरु भएको भेला बिहीबार समापन गर्ने तयारी छ ।
भेलामा नेकपाका देशभरका जनप्रतिनिधि सहभागी छन् । भेलामा स्थानीय तह विभाग प्रमुख अग्निप्रसाद सापकोटाले आगामी कार्ययोजना प्रस्तुत गरेका छन् । स्थानीय तह बलियो भए मात्रै केन्द्रीयस्तरमा समाजवादउन्मुख गन्तव्य हासिल गर्न आवश्यक आधार तयार हुने उनको ठम्याइ छ ।
विगतका कमजोरीको समीक्षा गर्दै नयाँ पुस्तालाई पूर्ण विश्वासमा लिएर उनीहरूको ऊर्जा र क्षमतालाई देश विकासमा परिचालन गर्नुपर्नेमा जोड दिइएको छ ।
सापकोटाले पालिकामा रहेका स्रोत, साधन र स्थानीय विशेषताको निरन्तर अध्ययन, अनुसन्धान, अन्वेषण र उपयोगमा ध्यान दिनुपर्ने आवश्यकता पनि औँल्याएका छन् । आगामी स्थानीय तहको निर्वाचन समाजवादी क्रान्तिको आधार तयार पार्ने लडाइँ हुने नेकपाको ठम्याइ छ ।
