सिस्नेरी–दक्षिणकाली सडकखण्डमा इभी दुर्घटना, नाै भारतीय नागरिक घाइते, तीनजनाको अवस्था गम्भीर

मकवानपुरको इन्द्रसरोवर गाउँपालिका– २, लामबगरस्थित सिस्नेरी–दक्षिणकाली सडकखण्डमा इभी गाडी दुर्घटना हुँदा नाैजना भारतीय नागरिक घाइते भएका छन् । दुर्घटनामा तीनजनाको अवस्था गम्भीर रहेको प्रहरीले जनाएको छ । जिल्ला प्रहरी कार्यालय मकवानपुरका अनुसार सोमबार राति करिब ११:१० बजे काठमाडौंबाट हेटौँडातर्फ आउँदै गरेको बा.प्र.०१–०३३ च ५२५८ नम्बरको इभी गाडी ब्रेक फेल भई सडकको दाहिनेपट्टिको भित्तामा ठोक्किँदा दुर्घटना भएको हो ।

दुर्घटनापछि प्रहरी चौकी खानीखेतबाट प्रहरी सहायक निरीक्षक मनोजकुमार यादवको नेतृत्वमा र प्रहरी चौकी सिस्नेरीबाट प्रहरी सहायक निरीक्षक रामवली साहको नेतृत्वमा टोली घटनास्थल पुगेर उद्धार गरेको थियो। प्रहरीका अनुसार गाडीमा चालकसहित ११ जना सवार थिए । तीमध्ये नाैजना भारतीय नागरिक र चालकसहित दुईजना नेपाली नागरिक रहेका थिए । दुर्घटनामा घाइते भएका सबैलाई उद्धार गरी उपचारका लागि काठमाडौं पठाइएको प्रहरीले जनाएको छ ।

दुर्घटनामा भारत बिहार दरभंगाका ६० वर्षीय रामविनय झा, ७० वर्षीया निर्मला देवी र ५५ वर्षीया अनिता देवी गम्भीर घाइते भएका छन् । उनीहरूको टाउकोमा चोट लागेको प्रहरीले जनाएको छ। यस्तै, ५६ वर्षीया प्रझा देवीको बायाँ हातमा, ५२ वर्षीया रुद्रकुमारी झाको दाहिने खुट्टामा तथा ७४ वर्षीय छत्रधर चौधरीको दुवै हातमा चोट लागेको छ । उनीहरूको अवस्था मध्यम रहेको प्रहरीले जनाएको छ ।

त्यसैगरी, ६७ वर्षीय हम्रानाथ झा, ६६ वर्षीय अमरनाथ झा र ४२ वर्षीया अनिता झा सामान्य घाइते भएका छन्। घाइते सबैलाई प्रारम्भिक उद्धारपछि बी एन्ड बी अस्पताल काठमाडौं पठाइएको थियो । पछि उनीहरूलाई अल्का अस्पताल ललितपुरमा भर्ना गरी उपचार भइरहेको प्रहरीले जनाएको छ। इभीचालक धनुषाको लक्ष्मीनिया नगरपालिका– ४ निवासी ३० वर्षीय पिन्टु सिंह प्रहरी नियन्त्रणमा रहेका छन् । गाडीमा सवार अर्का नेपाली नागरिक २२ वर्षीय असान साफी भने सामान्य अवस्थामा आफैँ घर फर्किएको प्रहरीले जनाएको छ ।