एनसेल फाउन्डेसनले बिहीबारसम्म नेपाल प्रिमियर लिग (एनपिएल) सिजन–२ मा हानिएका चौकाबापत दुई हजारभन्दा बढी शैक्षिक सामग्री वितरण गर्ने भएको छ । क्रिकेटलाई कक्षाकोठासँग र हरेक चौकालाई उज्ज्वल भविष्यसँग जोड्ने सामाजिक पहलअनुसार यी सामग्री सरकारी तथा सामुदायिक विद्यालयमा अध्ययनरत विद्यार्थीलाई प्रदान गरिने कम्पनीले जनाएको छ ।
गत वर्ष सुरु गरिएको यो पहलले नेपालभरका सरकारी र सामुदायिक विद्यालयका विद्यार्थीलाई सहयोग गर्दै आएको छ । एनपिएल सिजन–२ का हरेक चौकामा चारवटा शैक्षिक सामग्री वितरण गर्ने प्रतिबद्धता फाउन्डेसनले जनाएको छ । बिहीबार (मंसिर १८) ९० खेलाडीले कुल पाँच सय १० चौका प्रहार गरेका छन् । जसबापत कम्पनीले दुई हजार ४० शैक्षिक सामग्री वितरण गर्नेछ । चौका प्रहार गर्ने शीर्ष तीन खेलाडीको सूचीमा पोखरा एभेन्जर्सका एडम रोसिङ्टन २७ चौकासहित अगाडि छन् ।
त्यस्तै, लुम्बिनी लायन्सका डार्सी सर्टले १९, काठमाडौं गोर्खाजका बेन चाल्र्सवर्थ र सुदूरपश्चिम रोयल्सका विनोद भण्डारीले १७–१७ चौका प्रहार गरेका थिए । यो पहलले शैक्षिक सामग्रीको वितरणमार्फत विद्यार्थीको शिक्षामा सकारात्मक परिवर्तन ल्याउन योगदान दिने कम्पनीले विश्वास लिएको छ । विद्यार्थीलाई प्रदान गरिने प्रत्येक किटमा झोलासहित कापी, पेन्सिल, सार्पनर, इरेजरलगायतका आवश्यक सामग्री रहनेछन् । यी सामग्रीले विद्यार्थीलाई पठनपाठनका लागि आवश्यक स्रोतको कमी घटाउन मद्दत गर्ने र उनीहरूको सिकाइमा योगदान पुर्याउने विश्वास गरिएको छ ।
