संयुक्त राष्ट्रसंघ युवा कार्यालयद्वारा दिगो विकास लक्ष्य (एसडिजी)का लागि विश्वभरि छनोट भएका युवामा नेपाली नागरिक पनि परेका छन् । नेपालकी ऐश्वर्या श्रेष्ठ विश्वका युवाहरूको सूचीमा एसडिजी युवा नेतृका रूपमा चयन भएकी हुन् । राष्ट्रसंघले विश्वका १७ जना युवालाई दिगो विकास लक्ष्यका लागि युवा नेता छनोट गरेको छ । राष्ट्रसंघ दिवसका अवसरमा सार्वजनिक गरिएको सूची युवाहरूको पाँचौँ संस्करण भएको नेपालस्थित राष्ट्रसंघीय कार्यालयले जनाएको छ ।
यस वर्षको १७ जना विश्वका युवामा पर्न सफल ऐश्वर्या हर्ट अफ नेपाल र अन्तरध्वनि नेपाल नामक संस्थाकी सहसंस्थापक हुन् । उनले दलित र जनजाति समुदायका बालबालिकाको शिक्षा, आमाहरूको सशक्तीकरण तथा पहुँच नपुगेका क्षेत्रहरूमा मानसिक स्वास्थ्य सेवाको विस्तारमा योगदान दिँदै आएको राष्ट्रसंघले बुधबार जारी विज्ञप्तिमा उल्लेख छ ।
‘ऐश्वर्याको चयनले नेपाली युवाको नेतृत्व र आवाजलाई विश्वमञ्चमा प्रतिनिधित्व गरेको छ,’ राष्ट्रसंघीय कार्यालयले भनेको छ । हरेक दुई वर्षमा राष्ट्रसंघ युवा कार्यालयले विश्वका युवा परिवर्तनकर्मीलाई छानेर एसडिजी युवा नेताका रूपमा सम्मान गर्दै आएको छ । दिगो विकास लक्ष्यका लागि सहयोगी कार्य गर्ने युवालाई राष्ट्रसंघले सम्मान गर्दै आएको छ । राष्ट्रसंघका अनुसार यसपटक १५० भन्दा बढी देशका ३३ हजारभन्दा बढी युवाले आवेदन दिएका थिए । १६ देखि ३३ वर्ष उमेर समूहका ती युवाबाट नेपालीसहित १७ जना छनोट भएका हुन् ।
