नेपालगन्ज रंगशालास्थित पौडीपोखरी सर्वसाधारणका लागि खुला गरिएको छ। बाँकेमा गर्मी बढेसँगै सर्वसाधारणका लागि पौडीपोखरी खुला गरिएको मध्यपश्चिमाञ्चल खेलकुद विकास समितिका प्रमुख महेश चन्दले जानकारी दिए । उनले सरसफाइ र आवश्यक जनशक्तिको व्यवस्थापन गरी १५ चैतदेखि पौडी खेल्न चाहने सर्वसाधारणका लागि पौडीपोखरी खुला गरिएको बताए। नेपालगन्ज रंगशालास्थित पौडीपोखरी ललितपुरपछिको दाेस्रो भएको दाबी गरिएको छ । उनले भने, ‘गर्मी बढेसँगै पौडीपोखरीलाई मर्मत र सरसफाइ गरी सबैका लागि खुला गरिएको छ ।’
उनले पौडी पोखरी प्रयोगका लागि शुल्क निर्धारण गरिएको बताए । उनले सर्वसाधारणका लागि प्रतिसिफ्ट दुई सय रुपैयाँ र विद्यार्थीका लागि प्रतिसिफ्ट एक सय रुपैयाँ शुल्क निर्धारण गरेको कार्यालय प्रमुख चन्दले बताए । उनले मासिक, अर्धवार्षिक र वार्षिक सदस्यता शुल्कसमेत निर्धारण गरिएको बताए । ‘आफ्नै स्विमिङ कस्टम ल्याएमा दुई सय र रंगशालाको कस्टम प्रयोग गरे थप ५० रुपैयाँ शुल्क लिँदै आएका छौँ । एक साथ १० जनाको समूह बनाएर आए एकजनाको शुल्क नलाग्ने नियम छ,’ कार्यालय प्रमुख चन्दले भने ।
समितिले स्पेसल र सदस्य समूहका लागि छुट्टाछुट्टै सिफ्ट बनाएको छ । स्पेसल र सदस्य समूहका लागि बिहान ८–१० बजे र स्पेसल ग्रुपका लागि बेलुकी ४ः३०–६ः३० बजेको समय निर्धारण गरिएको उनले बताए । ‘बिहान ८ बजेदेखि पौडीपोखरी खुल्छ । दिनभर सञ्चालन भए पनि स्पेसल र सदस्यका लागि निश्चित समय निर्धारण गरिएको छ,’ उनले भने ।
पौडीपोखरी पुल सञ्चालनका लागि प्रशिक्षक र जीवन रक्षकको समेत व्यवस्था गरिएको उनले बताए । ‘स्विमिङ गर्नेहरूले अनिवार्य रूपमा स्विमिङ कस्टम लगाउनुपर्ने नियम बनाइएको छ,’ उनले भने । उनले गत वर्षभन्दा यस वर्ष अझ व्यवस्थित बनाइएको जिकिर गरे । एक साथ १५० जनाले स्विमिङ गर्न सकिने यो पौडीपोखरीमा महिला र पुरुषका लागि छुट्टाछुट्टै क्षेत्र निर्धारण गरिएको छ । ‘पौडी खेल्नेको सुरक्षाका लागि सम्पूर्ण व्यवस्था मिलाइएको छ,’ चन्दले भने ।
