जापानका प्रधानमन्त्री शिगेरू इसिबाले अमेरिकी करबाट प्रभावित व्यवसायका लागि करिब एक हजार परामर्श केन्द्र स्थापना गर्ने घोषणा गरेका छन् । साथै उनले कर पाउन निरन्तर प्रयास गर्ने प्रतिबद्धता पनि जनाएका छन् ।
टोकियो वासिङ्टनको सबैभन्दा नजिकको आर्थिक र रणनीतिक मित्रराष्ट्र हो । यहाँका कम्पनीहरू संयुक्त राज्य अमेरिकामा सबैभन्दा ठुला लगानीकर्ता हुन् र करिब १० प्रतिशत जापानी रोजगार अटो क्षेत्रसँग जोडिएका छन् ।
ट्रम्पले कुन देशमा कुन–कुन कर लगाइने त्यसको घोषणा गर्ने बताएका थिए । साथै उनले सबै व्यापारिक साझेदारहरू यसको निशानामा रहेको चेतावनी दिएका थिए । उनले अप्रिल ३ मा संयुक्त राज्य अमेरिकामा निर्माण नभएका सबै अटोमा २५ प्रतिशत कर लगाउने पनि बताएका थिए ।
जापानी प्रधानमन्त्री इसिबाले मंगलबार अमेरिकी आयातमा प्रतिशोधात्मक भन्सार शुल्क लगाउनेबारे बोलेनन्, तर आफ्नो सत्तारूढ गठबन्धनसँग ‘प्रतिक्रियात्मक उपायहरूको विवरण’मा छलफल गर्ने बताए ।
अहिलेका लागि एक हजार परामर्श डेस्क खोल्नुका अतिरिक्त उनले अमेरिकी भन्सार शुल्कहरू सक्रिय भएपछि साना र मध्यम आकारका व्यवसायहरूलाई कोष प्राप्त गर्न मद्दत गर्न सक्दो प्रयास गर्ने उल्लेख गरे ।
‘जापान अमेरिकाका लागि सबैभन्दा ठुलो लगानीकर्ता हो । यसलाई ध्यानमा राख्दै हामी जापानको छुटका लागि कडा आह्वान गर्न जारी राख्नेछौँ,’ उनले पत्रकार सम्मेलनमा भने, ‘यदि मैले आफैँ (संयुक्त राज्य अमेरिका) भ्रमण गर्नु आवश्यक ठानिएको छ भने, म त्यसो गर्न हिचकिचाउँदिनँ ।’
शुक्रबार प्रधानमन्त्री इसिबाले कार र पार्टसमा २५ प्रतिशत कर घोषणा गरिएपछि ट्रम्पको करसम्बन्धी विचारहरू ‘बुझ्न कठिन’ भएको बताएका थिए ।
‘राष्ट्रपति ट्रम्पले त्यहाँ साथी र शत्रु दुवै छन् र साथीहरू अझ कठिन हुन सक्छन् भनिरहनुभएको छ । यो बुझ्न धेरै कठिन छ,’ इसिबाले एक संसदीय समिति बैठकमा भने ।
