रामेछापको मन्थली नगरपालिकामा फलामको हम्मरले दुईजनाको टाउकोमा प्रहार गरी घाइते बनाउने एकजनालाई प्रहरीले पक्राउ गरेको छ।
पक्राउ पर्नेमा सुनसरी जिल्ला इटहरी उपमहानगरपालिका– ४ घर भई हाल मन्थली नगरपालिका– १ बस्ने वर्ष ४६ का सोमबहादुर माझी रहेका छन्। उनले शुक्रबार राति मन्थली नगरपालिका– १ स्थित २४ वर्षका रोशन नेपाली र रामेछाप नगरपालिका– ८ का वर्ष २९ का ओमकार सार्कीलाई फलामको हाते हम्मरले टाउकोमा प्रहार गरी घाइते बनाएका थिए।
शुक्रबार राति मन्थली नगरपालिका– १ स्थित वर्ष २२ की संगीता नेपाली र माझीबिच विवाद भएको थियो। विवादकै क्रममा संगीता नेपालीका श्रीमान् रोशन नेपाली र ओमकार सार्कीले सम्झाउँदै गर्दा माझीले फलामको हम्मरले अन्धाधुन्ध प्रहार गरेका थिए।
प्रहरीले घाइते अवस्थामा फेला परेका दुईजनालाई उपचारका लागि मन्थली अस्पताल पठाएको र माझीलाई पक्राउ गरी ज्यान मार्ने उद्योगमा मुद्दा दर्ता गरी रामेछाप जिल्ला अदालतबाट एक हप्ताको म्याद थप गरी अनुसन्धान कार्य भइरहेको जिल्ला प्रहरी कार्यालय रामेछापका सूचना अधिकारी कौशल न्यौपानेले जानकारी दिए।
