अस्पतालबाट फरार भएका एकजना कैदीलाई प्रहरीले एक हप्तापछि पक्राउ गरेको छ। विराटनगरस्थित कोशी अस्पतालमा उपचार गराउँदै आएका मोरङ कारागारका कैदी विराटनगर– ८ का २४ वर्षीय मोहम्मद अहमदलाई प्रहरीले सात दिनपछि पक्राउ गरेको हो।
बलात्कार कसुरमा १२ वर्ष कैद र एक लाख रुपैयाँ जरिवाना सजाय पाएका कैदी मोहम्मद कोशी अस्पतालमा पेटको उपचार गराउने क्रममा प्रहरीलाई झुक्याएर १७ साउनमा फरार भएका थिए।
उनलाई इप्रका रानीको टोलीले जहदा गाउँपालिका– १ तारेगामास्थित नेपाल–भारत सीमाक्षेत्रबाट २४ साउन बिहान पक्राउ गरेको कोशी प्रदेश प्रहरी विराटनगरले जनाएको छ। कैदी मोहम्मद २९ फागुन ०७९ देखि बालिका बलात्कार कसुरमा कैद सजाय भुक्तान गरिरहेका थिए ।
