बहुपक्षीय प्राविधिक तथा आर्थिक सहयोगका लागि बंगालको खाडी प्रयास (बिमस्टेक) का परराष्ट्रमन्त्रीहरूको दोस्रो अनौपचारिक बैठकमा नेपालबाट परराष्ट्रसचिव सेवा लम्सालले सहभागिता जनाउने भएकी छिन् ।
बैठकमा उपप्रधानमन्त्री एवं परराष्ट्रमन्त्री नारायणकाजी श्रेष्ठलाई निमन्त्रणा थियो । तर, शुक्रबार सरकारले विश्वासको मत नपाउने अवस्थासँगै पदमुक्त हुनुपर्ने अवस्थाका कारण श्रेष्ठको सट्टा परराष्ट्रसचिव लम्साल सहभागी हुने भएकी हुन् । बैठकमा सहभागी हुन परराष्ट्रका अधिकारीहरूसहित लम्साल बुधबार भारतको नयाँदिल्ली पुगेकी छिन् ।
भारतीय विदेशमन्त्री डा. एस जयशंकरले बिहीबार र शुक्रबारका लागि नयाँदिल्लीमा आयोजना गरेको बिमस्टेक विदेशमन्त्रीहरूको बैठकमा नेपालको प्रतिनिधित्व लम्सालले गर्ने परराष्ट्र मन्त्रालयले जनाएको छ । बिमस्टेकका सबै सदस्य मुलुकका प्रतिनिधिमण्डलले भारतीय प्रधानमन्त्री नरेन्द्र मोदीसँग सामूहिक रूपमा भेटवार्ता गर्ने पनि तय भएको परराष्ट्रद्वारा जारी विज्ञप्तिमा उल्लेख छ ।
बैठकमा नेपालबाहेक बिमस्टेकका सदस्य मुलुक भारत, भुटान, बंगलादेश, श्रीलंका, थाइल्यान्ड र म्यानमारका परराष्ट्रमन्त्री सहभागी हुनेछन् । यस वर्ष ७ जेठदेखि बिमस्टेक घोषणापत्र कार्यान्वयनमा आएको छ । बिमस्टेक परराष्ट्रमन्त्रीहरूको पहिलो अनौपचारिक बैठक (रिट्रिट) एक वर्षअघि थाइल्यान्डले बैंककमा आयोजना गरेको थियो ।
