कोरियाबाट फर्किएकै दिन एक युवकको सार्वजनिक बसमा नेपाली रुपैयाँ नौ लाख २३ हजारबराबरको अमेरिकी डलर चोरी भएको छ । प्रहरीले चोरीमा संलग्न तीनजना र स्रोत नखुलेको डलर साट्ने एक व्यवसायीलाई पक्राउ गरेको छ ।
कोरियाबाट फर्किएका विष्णु अधिकारीको गत मंगलबार सार्वजनिक बसमा सात हजार ४७ अमेरिकी डलर (नौ लाख २३ हजार नेरु) चोरी भएको हो । उनी विमानस्थलबाट सार्वजनिक बसमै ग्वार्काे पुगे । बसबाट झर्दा झोलामा रहेको डलर हराएको थाहा पाएपछि उनको होसहवास उड्यो । विदेशमा कमाएको पैसा नेपाल आएलगत्तै गुमाएपछि हतार–हतार प्रहरीमा पुगे ।
प्रहरीले सोही दिन नै सूक्ष्म अनुसन्धान गरी चोरीमा संलग्न तीनजनालाई पक्राउ गर्न सफल भएको हो । सिन्धुपाल्चोक इन्द्रावती गाउँपालिका वडा नम्बर ६ घर भई हाल जिल्ला भक्तपुर ठिमी बस्ने सञ्जीव तामाङ, पर्साको ठोरी गाउँपालिका वडा नम्बर ५ घर भई काठमाडौंको दक्षिणकाली बस्ने आइतमान तामाङ तथा सिन्धुपाल्चोक लिसंखुपाखर गाउँपालिका वडा नम्बर ३ घर भई हाल ललितपुर इमाडोल बस्ने सबिना तामाङलाई काठमाडौं उपत्यका अपराध अनुसन्धान कार्यालयले पक्राउ गरेको हो । ‘उनीहरू पेसेवर पकेटमार हुन्,’ अपराध अनुसन्धान कार्यालयका एसएसपी डा. मनोज केसी भन्छन्, ‘सम्बन्धित व्यक्तिले चाल नै नपाई पैसा निकाल्न उनीहरू सफल भएका थिए ।’ विमानस्थलबाट नै निगरानी र पिछा गरी उनीहरूले अधिकारीलाई लुट्ने योजना बनाएको हुन सक्ने प्रहरी आशंका छ । बसमा सामान्य भिडभाड भएकाले त्यही मौकामा अधिकारीको पैसा चोरेका हुन् ।
प्रहरीले चोरीको डलर साट्ने ललितपुर वकुबहालस्थित महाबुद्ध मनी एक्सचेन्जकी सञ्चालिका मंगललक्ष्मी श्रेष्ठलाई पनि पक्राउ गरेको छ । स्रोत नखुलेको डलर साटेकाले उनलाई पक्राउ गरिएको एसएसपी केसीले बताए । उनले २८ सय डलर साटेकी थिइन् । सो डलर पनि प्रहरीले बरामद गरेको छ । पक्राउ परेकाहरूसँग दुई लाख नगद भेटिएको प्रहरीले जनाएको छ । पक्राउ परेका उपर ललितपुर प्रहरीले कारबाही अघि बढाएको छ ।
एलओडी क्लबका सञ्चालक पक्राउ
ठमेलस्थित एलओडी (लर्ड अफ ड्रिंक्स) क्लबका सञ्चालक राजुसिंह सुवाललाई प्रहरीले पक्राउ गरेको छ । सो क्लबमा पुगेकी एक नाबालिका बलात्कृत भएपछि प्रहरीले क्लबका सञ्चालकमाथि पनि कारबाही अघि बढाएको हो ।
गत ३१ जेठमा क्लबमा १५ वर्षीया एक किशोरी पुगेकी थिइन् । त्यहीँ चिनजान भएका सुदन कोइरालाले उनलाई ललितपुरमा लगेर बलात्कार गरेका थिए । घटनाको अनुसन्धानमा नाबालिकालाई क्लबमा प्रवेश गराएको खुलेपछि सञ्चालकलाई पनि पक्राउ गरिएको जिल्ला प्रहरी परिसर काठमाडौंका एसएसपी सिद्धिविक्रम शाहले बताए । सो घटनाका क्लबका सञ्चालकलाई भने बालबालिकासम्बन्धी ऐनअनुसार कारबाही गर्न लागिएको छ । क्लबका अर्का सञ्चालक रुदिल श्रेष्ठविरुद्ध पनि पक्राउ पुर्जी जारी भएको छ । सो घटनापछि ठमेलका क्बलले उमेर खुल्ने परिचयपत्र हेरेर मात्र किशोर–किशोरीलाई क्लबभित्र प्रवेश दिन थालेका छन् ।
