काठमाडौं उपत्यकामा प्रहरीले आज बिहानै गरेको विशेष चेकिङको क्रममा एक सय सातजना चालक ट्राफिक प्रहरीको कारबाहीमा परेका छन् ।जसमा कागजपत्र साथमा नबोकेका सातजना र अवस्था ठीक नभएका सवारीसाधन चलाउने १० जना गरी १७ जना पानी बोक्ने गाडीका चालक कारबाहीमा परेका हुन् ।
त्यस्तै, ट्राफिक नियम उल्लंघन गर्ने आठवटा स्कुलबसका चालकलाई पनि कारबाही गरीएको छ । सवारीको अवस्था ठीक नराख्ने तीनजना, झ्यालमा डन्डी नराख्ने तीन जना र कागजपत्र साथमा नबोक्ने दुईजना गरी आठजना स्कुलबसका चालकहरू रहेका छन् ।
योसँगै कागजपत्र साथमा नबोकेका एकजना एम्बुलेन्सचालक र ८१ जना अन्य चालकलाई पनि विविध कसुरमा कारबाही गरिएको छ । सडकमा सहज र सुरक्षित यात्रा गराउन र ट्राफिक नियम पालना गराउन विशेष चेकजाँच गर्ने गरेको काठमाडौं उपत्यका ट्राफिक प्रहरी कार्यालयका प्रवक्ता एवं प्रहरी वरिष्ठ उपरीक्षक राजेन्द्रप्रसाद भट्टले जानकारी दिए ।
