- वि.सं २o७९ कार्तिक १ मंगलबार
भद्दा मेकअप मन पर्दैन । मलाई नेचुरल नै मन पर्छ । काम पर्दाबाहेक अधिकांश समय म घरमै हुन्छु । त्यतिवेला कुनै मेकअप गर्दिनँ । बाहिर निस्कनुपर्दा सनस्क्रिन क्रिम लगाउँछु । यसले घामको विकिरणबाट छालालाई जोगाउँछ ।
हेभी मेकअपमा कम्फर्टेबल फिल हुँदैन । कुनै विशेष कार्यक्रममा जानुपर्यो भने हल्का मेकअप गर्छु । सुटिङ सेटमा भने मेकअप गर्नैपर्ने हुन्छ । त्यतिवेला आवश्यकताअनुसार गर्छु ।ब्युटी प्रडक्टले छाला स्वस्थ राख्छ भन्ने विश्वास मलाई लाग्दैन । हामीले प्रयोग गर्ने कतिपय ब्युटी प्रडक्ट उल्टै हानिकारक हुन्छन् । त्यसैले म अरूलाई पनि ब्युटी प्रडक्ट प्रयोग गर्न सिफारिस गर्दिनँ ।
छालालाई स्वस्थ्य राख्नका लागि सन्तुलित खानपान र पर्याप्त निद्रा जरुरी हुन्छ । म पर्याप्त पानी पिउँछु । सिजनअनुसारका फलफूल खाइरहकै हुन्छु । तनाव कम लिन्छु । सकारात्मक सोच्छु । सकारात्मक सोचले हाम्रो व्यक्तित्वमा निखार ल्याउँछ । आत्मविश्वास बढाउँछ ।
मानिसको सुन्दरता छालाका आधारमा मात्रै मापन गरेर हुँदैन । राम्रो सोचियो भने संसार आफैँ हराभरा र सुन्दर लाग्छ । बाहिरी आवरण सुन्दर देखिए पनि सोच राम्रो हुन सकेन भने मानिस तनावमा रहन्छ ।
