- वि.सं २o७९ श्रावण १९ बिहीबार
नेकपा एमालेका सांसद डा. भीम रावलले सरकारले राज्यलाई द्वन्द्वतिर धकेलेको आरोप लगाएका छन्। सरकारले अमेरिकी राज्य साझेदारी कार्यक्रम (एसपिपी)मा संलग्न नहुने भनी पत्र पठाएको भने पनि प्रधानसेनापतिलाई आइपिएसको कार्यक्रममा पठाएर नेपाललाई द्वन्द्वतिर धकेलेको बताए।
बिहीबार सिंहदरबारमा बसेको राज्यका निर्देशक, सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको बैठकमा उनले सरकार विदेशी शक्तिसँग घुँडा टेकेर जनतालाई एसपिपीबारे पूर्ण जानकारी गराउन डराइरहेको आरोप लगाए।
‘एसिया महादेशमा पनि नयाँ द्वन्द्वको अवस्था सिर्जना भएको छ। यस्तो स्थितिमा हाम्रो देशका प्रधानसेनापति राज्य साझेदारी कार्यक्रममा जाने कुराले द्वन्द्वतिर धकेल्दैन ? यो संविधानअनुकुल छ ? यस्तो कुरा आखिर यो सरकारले किन गरिरहेको छ? यसले नेपाललाई द्वन्द्वको भुमरिमा धकेल्छ,’ रावलले भने।
सांसद रावलले एसपिपीको बारेमा अमेरिकालाई पठाएको पत्र अमुक देशका राजदूतावासका कर्मचारीले पढ्न पाउने तर देशका जनताका प्रतिनिधिलाई नदिनुले सरकार आफ्नो जिम्मेवारीबाट पन्छिरहेको टिप्पणी गरे।
