अर्थ प्रिन्ट संस्करण

बुटवल पावरलाई आइक्यान अवार्ड

बुटवल पावर कम्पनी लिमिटेड नेपाल चार्टर्ड एकाउन्टेन्ट्स संस्था (आइक्यान)बाट सम्मानित भएको छ । कम्पनी साधारण क्षेत्रको आर्थिक वर्ष २०७७/७८ मा प्रकाशित वार्षिक प्रतिवेदनका आधारमा संस्थाको वित्तीय पारदर्शिता, जवाफदेहिता र सुशासनका लागि ‘उत्कृष्ट वार्षिक वित्तीय प्रतिवेदन २०२१’ अवार्डबाट सम्मानित भएको हो । 

काठमाडौंमा आयोजित एक कार्यक्रममा महालेखा नियन्त्रक सुमनराज अर्याल र आइक्यानका अध्यक्ष युद्धराज ओलीले संयुक्त रूपमा कम्पनीका प्रमुख कार्यकारी अधिकृत उत्तरकुमार श्रेष्ठलाई अवार्ड प्रदान गरेका थिए । यस अवार्डले कम्पनीलाई आगामी दिनहरूमा अझ बढी परिष्कृत वित्तीय विवरण प्रकाशित गर्न हौसला मिलेको जनाइएको छ । कम्पनीको परिष्कृत वार्षिक प्रतिवेदनले साउथ एसियन फेडेरेसन अफ एकाउन्टेन्ट्स (साफा)ले दक्षिण एसियालीस्तरमा आयोजना गर्ने उत्कृष्ट वार्षिक प्रतिवेदन अवार्डका लागि समेत प्रतिस्पर्धा गर्ने कम्पनीले जनाएको छ ।

कम्पनीले हाल ९.४ मेगावाट तथा १२ मेगावाट क्षमताका दुईवटा जलविद्युत् केन्द्रबाट विद्युत् उत्पादन गरी स्याङ्जा, पाल्पा, प्युठान तथा अर्घाखाँची जिल्लाका करिब ६० हजार ग्राहकलाई विद्युत् वितरण गरिरहेको जनाएको छ । हाल सञ्चालनमा रहेको ६० मेगावाटको खिम्ती प्रथम, ३० मेगावाटको न्यादी तथा चार मेगावाटको खुदी जलविद्युत् आयोजनाहरूमा पनि कम्पनीको लगानी रहेको छ । त्यस्तै, निर्माणको चरणमा रहेका मस्र्याङ्डी बेसिनका करिब ६ सय मेगावाटको तीनवटा जलविद्युत् आयोजनामा समेत लगानी रहेको कम्पनीले जनाएको छ ।