बुलिङटार गाउँपालिका अध्यक्षमा नेकपा एमालेका दीपेन्द्र सुनारी ४,०५९ मतका साथ विजयी भएका छन् । उनका निकटतम् प्रतिद्वन्द्वी नेपाली कांग्रेसका शशिकिरण बस्ताकोटीले ३,९०० मत ल्याएका छन् । बस्ताकोटी यसअघि कांग्रेसबाट बुलिङटारमा गाउँपालिका अध्यक्ष निर्वाचित भएका थिए ।
२०७४ को स्थानीय तह निर्वाचनमा बुलिङटार गाउँपालिकामा नेपाली कांग्रेसले फराकिलो मत अन्तरले पालिका अध्यक्ष र उपाध्यक्ष दुवैका साथै ६ वटै वडामा जित हात पारेको थियो ।
गाउँपालिका उपाध्यक्षमा भने नेपाली कांग्रेसकी दिलमाया राना विजयी भएकी छिन् । उनले ४,२७३ मत पाउँदा उनकी निकटतम् प्रतिद्वन्द्वी नेकपा एमालेकी भूमिका खण्डलुकले ३,५१९ मत प्राप्त गरिन् । गाउँपालिकाको १, २, ३, ४ र ६ नम्बर वडामा कांग्रेस र ५ मा नेकपा एमालेले जित हात पारेको छ ।