- वि.सं २o७९ बैशाख ३१ शनिबार
हावाहुरीसँगै चट्याङ् परेर सिराहाको गोलबजार नगरपालिका १० डण्डा टोलका एक वृद्धको मृत्यु भएको छ । गाउँदेखि पूर्वपट्टि खेतमा भैंसी चराउन गएका बेला शुक्रबार अपरान्ह चट्याङ् लागेर स्थानीय ६५ वर्षीय रावीन्द्र महतोको मृत्यु भएको जिल्ला प्रहरी कार्यालय सिराहाले जनाएको छ ।
भैंसी चढेर चराउँदै गरेका बेला वर्षासहितको हावाहुरी चलेपछि चट्याङ् लागेर महतोसहित उनको भैसी समेत मरेको स्थानीय ज्ञानकुमार सिंहले जानकारी दिए ।
सिराहा प्रहरीका सूचना अधिकारी प्रहरी नायव उपरीक्षक सुवास बुढाथोकीका अनुसार चट्याङ् लागेर महतोको शरीरको केही भाग जलेको छ । महतोको शव पोष्टमार्टमको लागि लहानस्थित प्रादेशिक अस्पतालमा ल्याइएको प्रहरीले जनाएको छ ।
