साहित्यकार यदुनाथ भट्टराईले लेखेको कृति ‘योद्धा’ सार्वजनिक भएको छ । साहित्य संगम चितवनले शनिबार भरतपुरमा आयोजना गरेको कार्यक्रममा उनको कृति लोकार्पण तथा कृतिमाथि विमर्श गरिएको हो ।
लोकार्पित कृतिको समीक्षा डिआर पोख्रेल र धनप्रसाद सुवेदीले गरेका थिए । उपन्यासकारले आफूले माओवादी द्वन्द्वकालमा भोगेको परिवेशलाई उपन्यासमा उतारेका छन् । २५ वर्षअघिको द्वन्द्वको आवश्यकता, थालनी र बलिदानीसँगै द्वन्द्वले सामाजिक, राजनीतिक, आर्थिक र सांस्कृतिक जीवनमा पारेको प्रभावलाई ग्रामीण भेगमा बसोवास गर्ने मंगली र कालु पात्रमार्फत प्रस्तुत गरिएको छ ।
यसअघि भट्टराईको युद्ध र शान्ति निबन्धसंग्रह सार्वजनिक भइसकेका छन् । लमजुङमा जन्मिएका लेखक भट्टराई अवकाशप्राप्त शिक्षक हुन् । उनी अहिले चितवनको भरतपुरमा बसोवास गर्छन् ।