निर्वाचनमुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियापन्ध्रौं वार्षिकोत्सव विशेषांकखेलकुदविश्वकोरोना अपडेटप्रवासकर्नर किकसम्पादकीय१३औँ वार्षिकोत्सव विशेषांकसाहित्यस्वास्थ्य र जीवनशैलीफिचरलाेकसेवा१४औँ वार्षिकोत्सव विशेषांकप्रेरक प्रसंगटर्निङ प्वाइन्ट्स-२०२२१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०टर्निङ प्वाइन्ट्स-२०१९प्रदेशब्लगEnglish
  • वि.सं २०७९ जेठ १३ शुक्रबार
  • Friday, 27 May, 2022
फाइल तस्बिर
२०७८ पौष १९ सोमबार १९:०८:००
Read Time : > 1 मिनेट
समाचार डिजिटल संस्करण

हिमपातका कारण एक सातादेखि रसुवागढी नाकाबाट आयात ठप्प

Read Time : > 1 मिनेट
२०७८ पौष १९ सोमबार १९:०८:००

चीनसँगको अन्तर्राष्ट्रिय व्यापारिक नाका रसुवागढीबाट एक सातादेखि आयात ठप्प बनेको छ । चीनतर्फको भूभागमा गत मंगलबार र बुधबार परेको बाक्लो हिमपातका कारण एक सातादेखि रसुवागढी नाका हुँदै नेपाल सामान आयात ठप्प भएको हो ।

करिब ३ फिटभन्दा बढी हिमपात हुँदा नेपाल सामान आयात प्रभावित भएको व्यवसायीहरूले बताएका छन् । बाक्लो हिमपातका कारण नेपाल ल्याउन चीनको केरुङस्थित गोदाममा राखिएको सामान लोड हुन नसकेको व्यवसायी पुरुषोत्तम पौडेलले बताए । 

केरुङमा बाक्लो हिमपातका कारण यातायात सञ्चालन नहुँदा सामान आयात प्रभावित भएको व्यवसायीहरूले बताएका छन् । व्यवसायी धर्म पौडेलका अनुसार केरुङमा २५ कन्टेनरभन्दा बढी सामान लोड भएर बसेका छन् ।

चिनियाँ पक्षले हिउँ पन्छाउन सुरु गरेको र अबको एक–दुई दिनभित्र सामान पठाउन सकिने जानकारी दिएको रसुवा भन्सार कार्यालय टिमुरेका प्रमुख रामप्रसाद मैनालीले बताए । ‘चीनबाट आयात हुने सामान केही पनि आएको छैन, एक–दुई दिनमा आयात सुरु हुन्छ,  हिउँ पन्छाउँदै छौँ भनेर जानकारी आएको छ, बुधबारसम्ममा आयात सुरु हुन्छ कि ।’

चिनियाँ पक्षले बिहान ७ कन्टेनर र साँझ २ कन्टेनर गरी दैनिक ९ वटा चिनियाँ कन्टेनरमार्फत रसुवागढीसम्म सामान आयात गर्ने गरेको थियो । मंगलबार बेलुका नै नाकामा आएर बसेका ७ कन्टेनरले बुधबार बिहान र २ कन्टेनरले बिहीबार बिहान रसुवागढीसम्म सामान ल्याएको बताइएको छ । चीनतर्फ बाक्लो हिमपात कारण हरेक वर्ष नेपाल आयात हुने सामान प्रभावित हुने  गरेको छ ।  

कोरोना संक्रमण सुरु भएयता चीनले कोटा प्रणालीमा सामान ल्याइरहेको छ । २०७६ माघ १५ देखि २०७७ जेठ २२ सम्म नाका बन्द भएको थियो । त्यसपछि चीनले रसुवागढी नाका एकतर्फी सञ्चालन गरेको हो । चीनले आफ्नै गाडीमा नेपालतर्फको भूभागमा सामान ल्याइदिने गरेको छ । 

अहिले रसुवागढी नाकाबाट चिनियाँ ९ वटा कन्टेनरमा सामान आयात भइरहेको छ । चिनियाँ एउटा गाडीमा आएको सामग्री नेपाली दुईवटा कन्टेनरमा नेपाली कामदारले लोड गर्ने गरेका छन् । चिनियाँ गाडीमा आएको सामग्री नेपाली गाडीमा लोड–अनलोड गर्न स्वास्थ्यका मापदण्ड अपनाउँदै नेपाली कामदार नाकामा खटिएका छन् ।

रसुवागढी नाका हुँदै अहिले नेपालतर्फ रेडिमेड कपडा, इलेक्ट्रोनिकलगायत  सामग्री भित्रिने गरेको छ । नेपालबाट केरुङतर्फ हस्तकलाका सामग्री  जाने गरेकोमा कोरोना संक्रमण सुरु भएपछि चीनले निर्यात रोकेको छ । २०७१ मंसिर १५ देखि रसुवागढी नाका विधिवत रूपमा सञ्चालनमा आएको हो । भूकम्पपछि रसुवागढी र तातोपानी नाका बन्द भएको थियो ।