रौतहटको चन्द्रपुर नगरपालिका– ८ मा दुईपक्षबीच झडप हुँदा एक दर्जन घाइते भएका छन् भने आठवटा मोटरसाइकलमा आगजनी भएको छ ।
बिहीबार रातिको समयमा बस्तीपुर गाउँमा जग्गाको पुरानो कुरालाई लिएर दुई पक्षबीच झडप भएको हो । स्थानीय श्रीराम चौधरी, लक्ष्मी चौधरी,जगनारायण चौधरी,दीपनारायण चौधरीको घरसमेत तोडफोड भएको इलाका प्रहरी कार्यालय चन्द्रनिगाहपुरका डिएसपी लीलाराज कोइरालाले जानकारी दिए ।
गाउँमा आफ्ना परिवारसँग झडप हुन थालेपछि स्थानीय ७० वर्षीय वृद्ध जगरनाथ चौधरीको हृदयघात भएर मृत्यु भएको छ । गाउँमा पुनः झडप हुने अवस्था नआओस् भन्नका लागि ठूलो संख्यामा सशस्त्र र नेपाल प्रहरी परिचालन गरिएको छ । सो घटनाको विषयमा प्रहरीले अनुसन्धान गरिरहेको डिएसपी लामिछानेले बताए ।
झडपमा परी घाइते भएका आकाश चौधरी, बिनेक चौधरी, मुथुनकुमार चौधरी, बच्चु चौधरीलगायत एक दर्जनको चन्द्रनिगाहपुरस्थित अस्पतालमा उपचार भइरहेको छ ।