जर्मनीले नेपाललाई भेन्टिलेटरसहित आपत्कालीन अत्यावश्यक स्वास्थ्य सामग्री उपलब्ध गराएको छ । जर्मनीको सामान लिएर विशेष चार्टर विमान आज बिहान आइपुगेको हो । त्रिभुवन अन्तर्राष्ट्रिय विमानस्थलमा नेपालका लागि जर्मनीका राजदूत रोल्यान्ड सेफरले स्वास्थ्यमन्त्री शेरबहादुर तामाङलाई सामग्री हस्तान्तरण गरेका हुन् ।
युरोपियन युनियनको नागरिक संरक्षण संयन्त्रअन्तर्गत जर्मन सरकारले ६२ थान भेन्टिलेटर, २७ हजार ५ सय थान एफएफपिटु मास्क, ३० हजार थान सर्जिकल मास्क, १०० वटा गम बुट, २०० वटा बडिब्याग, पाँचवटा आइसोलेसन सेन्टरलाई पुग्ने टेन्ट र डिस्इन्फेक्टेन्ट झोल २५ हजार लिटर उपलब्ध गराएको हो ।
थप सामानहरू अर्को जहाजबाट आउन लागेको परराष्ट्र मन्त्रालयले जनाएको छ । स्वास्थ्य सामग्री सहयोगप्रति स्वास्थ्यमन्त्री तामाङले जर्मन सरकारलाई धन्यवाद दिएका छन् ।