![](https://nayapatrika.blr1.cdn.digitaloceanspaces.com/news/images/lamjung-sadk2021-05-24-12-15-00.jpeg)
कोरोना भाइरसको दोस्रो लहरबाट नेपालका धेरै जिल्लामा निषेधाज्ञा भएको छ । लमजुङमा पनि समुदायस्तरमा कोरोना संक्रमण फैलिएपछि निषेधाज्ञा गरिएको छ । तर, जिल्लामा निषेधाज्ञाका बीच पनि विकास निर्माणको कामलाई भने निरन्तरता दिइएको छ ।
जिल्लामा विकास आयोजनालाई प्रभावित हुन नदिइएको लमजुङका प्रमुख जिल्ला अधिकारी होमप्रसाद लुइँटेलले बताए । उनले भने, ‘सामाजिक दूरी कायम गरेर विकास निर्माणका कामलाई प्रभावित पारिएको छैन ।’ गत वर्षको बन्दाबन्दीमा जिल्लामा धेरै विकास निर्माणका काम रोकिएका थिए । रोखिएका काम करिब नौ महिनापछि सञ्चालनमा आएका थिए । निर्माण सामग्री, उपकरणको व्यवस्था अपनाएर विकास निर्माणका कामलाई निरन्तरता दिइएको पूर्वाधार विकास कार्यालय लमजुङका प्रमुख इन्जिनियर सुमन गिरीले बताए ।
उनले भने, ‘लमजुङको राइनास नगरपालिकाअन्तर्गत मुख्य सडक मानिएको नेपालडाँडा–तार्कुघाट–बोराङखोला सडक कालोपत्रेको काम पनि धमाधम भइरहेको छ ।’ गण्डकी प्रदेश सरकारको प्रादेशिक सडक योजनाअन्तर्गत नेपालडाँडा–राइनास–बोराङ सडकखण्डअन्तर्गत १० किलोमिटर सडक कालोपत्रे अन्तिम चरणमा पुगेको छ ।
नौ महिना लकडाउन भए पनि निर्धारित समयभन्दा पाँच महिना अगावै निर्माणकार्य सकिने सडक निर्माणको जिम्मा लिएको लामा कन्सट्रक्सन प्रालिले जनाएको छ । कम्पनीका प्रोजेक्ट म्यानेजर मधुसूदन साँखीले पाँच किलोमिटर काम सम्पन्न भइसकेकाले आयोजनाको काम जेठ महिनाभित्रै सकेर पूर्वाधार विकास कार्यालयलाई हस्तान्तरण गरिने बताए । प्रदेश सरकारको एक निर्वाचन क्षेत्र एक सडक कार्यक्रमअन्तर्गत उक्त सडक ०७६ पुसबाट ०७८ मसिर महिनामा सम्पन्न हुने गरी निर्माण सुरु भएको हो ।
सडक कालोपत्रेका लागि प्रदेश सरकारले २८ करोड ८४ लाख ८३ हजार एक सय ८७ रुपैयाँ ५५ पैसा विनियोजन भएको गरेको थियो । उक्त सकड कालोपत्रे भएसँगै राइनास नगरपालिकासँगै दूधपोखरी गाउँपालिकाको मुख्य मार्गको रूपमा रहेको उक्त सडक कालोपत्रे भएसँगै दुवै स्थानीय तह र छिमेकी जिल्ला गोरखाका नागरिकलाई पनि सहज हुनेछ । राइनास सडकसँगै जिल्लाका आधा दर्जन सडक कालोपत्रे र ग्राभेलको काम धमाधम भइरहेको पूर्वाधार विकास कार्यालय लमजुङले जनाएको छ । साथै चारवटा मोटरेबल पुलको निर्माण कार्य पनि भइरहेको छ ।