- वि.सं २o८१ जेठ १ मंगलबार
भरतपुर महानगरपालिका– १४ बरौजीमा रहेको बिजुलीको ट्रान्सफर्मर क्षतिपूर्ण अवस्थामा भेटिएको छ । चालू अवस्थामा रहेको एक सय ५० केभिएको ट्रान्सफर्मर शुक्रबार बिहान स्थानीयको बारीमा बिजुलीको पोलमुनि फालेको अवस्थामा भेटिएको हो ।
घरमा विद्युत् नभएको र ट्रान्सफर्मर खेतबारीमा देखेपछि स्थानीयले विद्युत् प्राधिकरणका कर्मचारीलाई यस विषयमा खबर गरेका थिए । यद्यपि के कारणले ट्रान्सफर्मरमा क्षति पुग्योे भने खुलेको छैन ।
नेपाल विद्युत् प्राधिकरणका सुपरभाइजर प्रदीप पौडेलले भने– ट्रान्सफर्मरलाई क्षति पुर्याउने गरी हावाहुरी पनि आएको छैन । अज्ञात समूहले ट्रान्सफर्मरमा प्रयोग हुने तामाको तार चोरी गर्ने उद्देश्यले यस्तो गरेको पनि हुन सक्ने आशंका गरे । यस विषयमा अनुसन्धान गरिने उनको भनाइ छ ।
विगतमा ट्रान्सफर्मर चोरीको घटना धेरै हुने गरेको भए पनि चितवनमा करिब तीन वर्षदेखि यस्ता घटना शून्य छन् । उनका अनुसार अहिले उक्त क्षेत्रमा नयाँ ट्रान्सफर्मर ल्याई विद्युत् सुचारु गर्ने प्रयास हुँदै छ ।
