नेपाली सेनाको गाडीले ठक्कर दिँदा सप्तरीमा एकजनाको मृत्यु भएको छ । पूर्वपश्चिम लोकराजमार्गअन्तर्गत सप्तरीको रुपनी गाउँपालिका १ स्थित नेपाली सेनाको गाडीले ठक्कर दिँदा मोटरसाइकलचालक सप्तरीको अग्निसाइर–कृष्णसवरण गाउँपालिका वडा नम्बर २ बस्ने ६५ वर्षीय रामचन्द्रप्रसाद चौधरी थारूको मृत्यु भएको जिल्ला प्रहरी कार्यालय सप्तरीले जनाएको छ ।
जिल्ला प्रहरी कार्यालय सप्तरीका प्रहरी नायब उपरीक्षक भुवनेश्वरप्रसाद साहका अनुसार पूर्वबाट पश्चिमतर्फ जाँदै गरेको बा १ ग १९८१ नम्बरको नेपाली सेनाको गाडीले सोही दिशाबाट जाँदै गरेको स ५ प ५०७६ नम्बरको मोटरसाइकललाई ठक्कर दिएको थियो । ठक्करबाट घाइते भएका थारूको उपचारका लागि राजविराजस्थित गजेन्द्रनारायण सिंह अस्पताल लैजाने क्रममा बाटोमै मृत्यु भएको डिएसपी साहले बताए ।
शव परीक्षणका लागि गजेन्द्रनारायण सिंह अस्पतालको शवगृहमा राखिएको छ भने गाडी र चालक सुनसरी धरान उपमहानगरपालिका वडा नम्बर १७ बस्ने वर्ष ३७ को मनीषराज राईलाई प्रहरीले नियन्त्रणमा लिई थप अनुसन्धान गरिरहेको साहले बताए ।