समाचार डिजिटल संस्करण

सेटिङमा साथ नदिएको भन्दै  बिपी प्रतिष्ठानका खरिद शाखा प्रमुखको सरुवा

धरानस्थित बिपी कोइराला स्वास्थ्य विज्ञान प्रतिष्ठानका उपकुलपति डा. ज्ञानेन्द्र गिरी आएको चार महिना नपुग्दै खरिद शाखा प्रमुख विष्णु चापागाईंलाई सरुवा गरेका छन् ।  कोरोना पोजेटिभ भएर होम आइसोलेसनमा बसेका उपकुलपतिले अन्य पदाधिकारीसँग छलफल नै नगरी चापागाईंलाई मंगलबार सरुवाको पत्र थमाएका हुन् ।  

धरानका व्यापारी चेतन अग्रवालको अनुकूलतामा काम नगरेपछि एकाएक आफूलाई सरुवा गरिएको चापागाईंको आरोप छ  । सरुवा गरेर उनलाई शैक्षिक प्रशासनको परीक्षा ब्लगमा पठाइएको छ । 

उनको स्थानमा चेतन अग्रवालका निकट मानिएका सामान्य प्रशासन महाशाखाका प्रमुख अशोक साहलाई ल्याइएको छ भने साहको ठाउँमा शैक्षिक प्रशासनबाट डिल्ली लुइँटेललाई लगिएको छ । 

सामान्य त कर्मचारीहरूको सरुवा दुई–दुई वर्षमा रजिस्ट्रारको सिफारिसमा हुने प्रावधान छ । तर, प्रतिष्ठानको नियमावलीविपरीत व्यापारीको स्वार्थमा चापागाईंलाई उपकुलपतिले सरुवा गरेका छन् । 
 
यस विषयमा बुझ्न प्रतिष्ठानका उपकुलपति डा. गिरीलाई सम्पर्क गर्दा फोन उठाएनन् ।  कुनै जानकारीविना नै एक्कासि पत्र आउँदा आफू आश्चर्यमा परेको चापागाईंले बताए । कुनै जानकारीविना पत्र आउनु अस्वाभाविक भएको उनको भनाइ छ ।  ‘विधि र प्रक्रियाविना मलाई हटाइयो । कसैैलाई मृत्युदण्ड दिँदासमेत अन्तिममा सोधिन्छ, अपराधबारे प्रायश्चित गर्ने मौका दिइन्छ । तर, कुनै जानकारीविना आफूलाई पत्र थमाइयो,’ चापागाईंले फोन सम्पर्कमा भने । 
यस विषयमा आफू परामर्श गरेर अघि बढ्ने चापागाईंले बताए । 

प्रतिष्ठान स्राेतका अनुसार चापागाईंले खरिद प्रक्रियामा पाँच लाखभन्दा बढीको खरिद प्रक्रियामा  सार्वजनिक खरिद अनुगमन कार्यालय (पिपिएमओ)मार्फत व्यवस्थित गर्ने काम गरेका थिए । पिपिएमओमार्फत गर्दा आफूअनुकूललाई टेन्डर लिन र दिन मिल्दैन । निष्पक्ष रूपमा टेन्डर प्रक्रिया हुने गर्छ ।

 चापागाईंको कार्यशैलीले बिपी प्रतिष्ठानबाट निरन्तर टेन्डर हात पार्दै आएका व्यापारीले नपाउने भएपछि चापागाईंलाई सरुवा गरिएको प्रतिष्ठान स्राेतको दाबी छ ।