रुकुम पश्चिममा शुक्रबार अहिलेसम्मकै बढी २३ जनामा कोरोना संक्रमण पुष्टि भएको छ ।
संक्रमित सबै चौरजहारी नगरपालिकाका हुन् । संक्रमितमध्ये १४ जना पुरुष र नाैजना महिला रहेका छन् । चौरजहारी प्रयोगशालामा एक सय ३९ जनाको पिसिआर टेस्ट गरिएकाेमा आज २३ जनामा कोरोना संक्रमण देखिएको हो ।
चौरजहारी नगरपालिकाका विभिन्न वडाहरूमा स्थायी ठेगाना भएका केही दिनअगाडि भारतबाट आई आइसोलेसनमा बसेका ११ जना पुरुष र सातजना महिला गरी जम्मा १८ जना, काठमाडौंदेखि आएका एकजना पुरुष र बाँकी दुईजना पुरुष तथा दुईजना महिला गरी चारजना र कन्ट्रयाक्ट ट्रेसिङका आधारमा पिसिआर परीक्षण गरिएको नगरपालिकाले जनाएको छ ।
नयाँ संक्रमितहरू वडा नं. २ का एकजना, ३ नं. वडाका दुईजना, ४ नं. वडाका दुईजना, ६ नं. वडाका ६ जना, ७ नं. वडाका ७ जना, ९ नं. वडाका २ जना, १२ नं. वडाका दुईजना र १४ नं. वडाका एकजना रहेका छन् । उनीहरूलाई नगरपालिकामा रहेका आइसोलेसनमा राखिएको छ ।
योसँगै जिल्लामा कोरोना संक्रमितको संख्या ९४ पुगेको छ । जसमध्ये ६२ जना कोरोना जितेर घर फर्किसकेका छन् ।
३२ जना सक्रिय संक्रमितहरू जिल्लाका विभिन्न आइसोलेसनमा रहेका छन् ।
उनीहरूको पनि स्वास्थ्य अवस्था सामान्य रहेको स्वास्थ्य सेवा कार्यालयले जनाएको छ ।