Englishमुख्य समाचारसमाचारदृष्टिकोणफ्रन्ट पेजअर्थअन्तर्वार्तामल्टिमिडियाखेलकुदविश्वकोरोना अपडेटप्रवासकर्नर किकसम्पादकीय१३औँ वार्षिकोत्सव विशेषांकस्वास्थ्य र जीवनशैलीफिचरलाेकसेवाप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०प्रदेशटर्निङ प्वाइन्ट्स-२०१९ब्लग
  • वि.सं २०७७ असोज ३ शनिबार
  • Saturday, 19 September, 2020
२०७७ भदौ ३० मंगलबार २१:३५:००
मुख्य समाचार डिजिटल संस्करण

नेपाली राजदूतसँग चिनियाँ उपमन्त्रीले भने– नाका सुचारु गर्न सहजीकरण गर्छौैं, दश लाख डलर मूल्यका औषधि दिन चीन तयार

बेइजिङमा राजदूत पाण्डे उच्चस्तरीय भेटवार्तामा 

२०७७ भदौ ३० मंगलबार २१:३५:००

चीनका लागि नेपाली राजदूत महेन्द्रबहादुर पाण्डेले मंगलबार चिनियाँ विदेश मन्त्रालयको एसिया, सिमाना, कन्सुलरलगायतका मामिला हेर्ने उपमन्त्री लुओ चाओहुईसँग भेटवार्ता गरेका छन् । राजदूत पाण्डेले नेपाल र चीनबीचका रसुवागढी र तातोपानी नाका सुचारु हुनुपर्ने, चीनमा अध्ययनरत नेपाली विद्यार्थीलाई चीन जान सहजीकरण गरिदिनुपर्ने, विगतका सम्झौता कार्यान्वयन गर्नुपर्नेलगायतका विषयमा चासो राखेका छन् । चिनियाँ उपमन्त्री लुओले नाका सुचारु गर्न सहजीकरण गर्ने र कोभिड महामारीविरुद्ध लड्न नेपाललाई स्वास्थ्य सामग्री दिनेसमेत आश्वासन व्यक्त गरेका छन् । 

गत वर्षसम्म दिल्लीमा भारतका लागि राजदूत रहेका उपमन्त्री लुओ हाल चिनियाँ विदेश मन्त्रालयमा सचिवसरहको जिम्मेवारीमा बेइजिङमा छन् । नेपाल तथा नेपाल–भारत सम्बन्धका जानकार रहेका उपमन्त्री लुओले राजदूत पाण्डेलाई अन्तर्राष्ट्रिय परिस्थिति, भारत–चीन विवादलगायतका विषयमा पनि चिनियाँ पछिल्लो धारणा सुनाएका छन् । राजदूतका रूपमा पाण्डे बेइजिङ गएपछि चिनियाँ उच्च अधिकारीसँग भएको यो पहिलो भेटवार्ता हो ।
 
नेपाली दूतावासका उपनियोग प्रमुख सुशीलकुमार लम्सालका अनुसार राजदूत पाण्डेले केरुङ– रसुवागढी तथा खासा –तानोपानी नाका सुचारु गर्न चिनियाँ अधिकारीलाई आग्रह गरेका छन् । सुरक्षाका उपाय अपनाएर दुवै नाका सुचारु गर्नुपर्ने पाण्डेको भनाइ थियो । दुवै नाका चिनियाँ तजबिजीमा खुल्दै आएका छन् । नाका खुलाएका वेला चिनियाँ पक्षले दैनिक पाँच ट्रक सामान मात्रै मितेरी पुलसम्म ल्याउन दिने गरेका छन् । नेपालबाट चीन जान नेपाली गाडीहरूलाई अहिले अनुमति छैन । राजदूत पाण्डेले सीमा क्षेत्रमा सयौैँ ट्रक अड्केको, करोडौँका सामान अलपत्र परेको भन्दै सहजीकरण गर्न आग्रह गरे । 

चिनियाँ उपमन्त्री लुओले नाका सुचारु गर्नुपर्ने विषयमा तिब्बत स्वशासित सरकार पनि चिन्तित रहेको बताए । तिब्बततर्फ कोभिडको संक्रमण बढ्ने चिन्ताका कारण नाका खुल्न नसकेको उनको संकेत थियो । सुरक्षात्मक उपाय अपनाएर नाका सुचारु गर्न सहजीकरण गर्ने विषयमा तिब्बत सरकारसँग कुरा गर्ने उनको भनाइ थियो ।  पाण्डेले कोभिड–१९ को महामारीका वेला र अघि नेपाल आएका विद्यार्थीलाई पुनः चीन फर्किन सहजीकरणका लागि आग्रह गरे । यसमा सहजीकरण गरिदिने चिनियाँ अधिकारीको भनाइ थियो । 

राजदूत पाण्डेले सांघाई कोपरेसन अर्गनाइजेसन (एससिओ) को डाइलग पार्टनरका रूपमा रहेको नेपाललाई पर्यवेक्षक मुलुकमा स्तरोन्नति गर्नुपर्ने धारणा पनि राखेका थिए । यस सम्बन्धमा चीनले सकारात्मक रूपमा विचार–विमर्श गर्ने लुओको जवाफ थियो । 

उपमन्त्री लुओले राष्ट्रपति सी जिनपिङको गत वर्ष असोजमा नेपाल भ्रमणका क्रममा भएका सम्झौता र सहमति कार्यान्वयनमा चीन चिन्तित र सक्रिय भएको बताए । उनले केरुङ काठमाडौं रेलजस्ता दीर्घकालीन परियोजनाहरू चरणबद्ध रूपमा अघि बढ्ने बताएका छन् । 

चिनियाँ राष्ट्रपतिको भ्रमणमा भएका सम्झौताअनुसार केरुङ काठमाडौं रेलमार्गको सम्भाव्यता अध्ययन सुरु गर्नुपर्नेमा लुओको जोड थियो । परिस्थिति सहज भएपछि यसका लागि चीनबाट प्राविधिक टोली नेपाल आउने तयारी छ । लुओले भने, ‘यो दीर्घकालीन परियोजना भएको हुनाले चरणबद्ध रूपमा काम अघि बढाउनुपर्छ ।’ नेपालको रेल विभाग तथा चीनको नेसनल रेल्वे एडमिनिस्ट्रेसनबीच नियमित छलफल र संवाद भइरहेको लुओको भनाइ थियो । उनले रेलका लागि नेपालमा पर्याप्त मानवस्रोत तथा उनीहरूमा प्राविधिक दक्षता अभाव भएको उल्लेख गर्दै यसका लागि पनि चीन थप सहयोग गर्न तयार रहेको बताए । नेपाली प्राविधिक टोलीलाई वेलावेलामा चीनमा तालिम दिइरहेको समेत उनले स्मरण गराएका थिए । रेल्वेका विषयमा प्रधानमन्त्री केपी शर्मा ओलीको चीन भ्रमणमा र चिनियाँ राष्ट्रपति सी जिनपिङको नेपाल भ्रमणमा पनि समझदारीपत्रमा हस्ताक्षर भएको स्मरण दुवै पक्षले गरेको छ । टोखा–छहरे सुरुङमार्ग निर्माणको सम्भाव्यता अध्ययनका लागि पनि चिनियाँ प्राविधिक टोली आउने लुओले बताए । 

संयुक्त राष्ट्रसंघीय मानव अधिकार परिषदमा नेपाल र चीन दुनै उम्मेदवार भएको र दुवैले एक–अर्कालाई सघाउने विषयमा पनि छलफल भएको थियो । नेपालले चीनलाई र चीनले नेपाललाई समर्थन गर्ने सहमति यसअघि नै भइसकेको उपनियोग प्रमुख लम्सालले बताए । 

चिनियाँ पक्षले कोभिड– १९ को महामारी नियन्त्रण तथा रोकथामका लागि नेपाललाई सहयोग जारी राख्ने चिनियाँ अधिकारीको भनाइ थियो । चीन, पाकिस्तान र माल्दिभ्सका परराष्ट्रमन्त्रीहरूको भिडियो कन्फ्रेन्सका क्रममा चीनले घोषणा गरेको १० लाख अमेरिकी डलरबराबरको स्वास्थ्य सामग्री पठाउन चीन तयार रहेको पनि उनको भनाइ थियो । यो मूल्यबराबरका सामग्रीको सूची पठाइदिए चीनले पठाउने प्रक्रिया प्रारम्भ गर्ने लुओले बताए । चीनमा विकसित हुने खोपलाई पब्लिक गुडका रूपमा नेपाललाई समेत उपलब्ध गराउने उनीहरूको चाहना पनि लुओले सुनाएका थिए । चिनियाँ राष्ट्रपति सी जिनपिङले नै यो घोषणा गरिसकेका छन् । नेपालजस्ता मुलुकले निःशुल्क खोप पाउने चिनियाँ अधिकारीको संकेत थियो । 

यसैबीच, नेपाल र चीनबीच सेप्टेम्बर २८ मा व्यापारसँग सम्बन्धित संयुक्त कार्यदलको बैठक भिडियोमार्फत बस्ने तय भएको छ । नेपालबाट उद्योग वाणिज्य तथा आपूर्ति मन्त्रालयका सहसचिव र चीनबाट आपूर्ति विभागका महानिर्देशकले भिडियो बैैठकको नेतृत्व गर्नेछन् ।