२०७७ भदौ २९ सोमबार १३:०३:००
सिल भएको नेपाल–भारत सिमानाबाट लागुऔषध सेवन गर्न भारत पुगेका एक नेपाली युवा भारतीय युवाले प्रहार गरेको गोली लागेर घाइते भएका छन् ।
विराटनगर– १७ मटेर्वा नाकाबाट आइतबार अपराह्न लागुऔषध सेवन गर्न भारतीय बजार जोगबनी पुगेका विराटनगर– १२ का २४ वर्षीय दीपक मण्डल भारतीय युवा मुकेश यादवले प्रहार गरेको गोली लागेर सामान्य घाइते भएका हुन ।
इलाका प्रहरी रानीका इन्स्पेक्टर राजेश थापाका अनुसार गोली प्रहारबाट मण्डलको दायाँ खुट्टाको औंलामा चोट लागेको छ ।
लागुऔषध सेवन गरेका मण्डलमाथि लागुऔषध कारोबारमा संलग्न भारतीय नागरिक मुकेश यादवले लेनदेनको आपसी विवादमा गोली प्रहार गरेको हुन सक्ने प्रहरीको भनाइ छ ।
गोली प्रहार भएपछि स्थानीयले भारतको जोगबनी बजारमै रहेको क्लिनिकमा उपचारका लागि मण्डललाई पुऱ्याएका थिए । तर, त्यहाँ पनि लेनदेनको विषयमा भारतीय युवाले हवाईफायर गरेपछि मण्डल भागेर साँझ नेपाल आएका थिए ।
प्रहरीले मण्डललाई विराटनगर रोडशेष चौकबाट नियन्त्रणमा लिएर उपचारका लागि कोसी अस्पताल पठाएको थियो । हाल उनको अवस्था सामान्य रहेको प्रहरीले जनाएको छ ।
इलाका प्रहरी कार्यालय रानीका निरीक्षक राजेश थापाका अनुसार नेपाली युवा मण्डल पनि लागुऔषध सेवन र ओसारपसारमा संलग्न व्यक्त्ति हुन् ।
उनीबाट लागुऔषध बरामद नभएकोले उनलाई यसअघि सम्झाएर छाडिएको प्रहरीले जनाएको छ । साथै घटना भारतमा भएकोले छानबिन गर्न भारतीय प्रहरीलाई आग्रह गरिएको प्रहरीले जनाएको छ ।
