सत्तारुढ नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल प्रचण्डबीच शुक्रबार डाकिएको स्थायी समिति बैठकका लागि एजेन्डा तय गर्न छलफल जारी छ ।
प्रधानमन्त्रीनिवास बालुवाटारमा दुवै अध्यक्षबीच छलफल जारी रहेको पार्टीका महासचिव विष्णु पौडेलले जानकारी दिए ।
१३ साउनदेखि पटक–पटक स्थगित भएको स्थायी कमिटी बैठक शुक्रबार (२६ भदौ) डाकिएको छ । स्थायी समिति बैठकमा प्रधानमन्त्री केपी ओलीको राजीनामा माग भएपछि पार्टीमा विवाद उत्पन्न भई बैठक स्थगित भएको थियो ।
विवाद समाधानका लागि महासचिव पौडलेको नेतृत्वमा गठन भएको कार्यदलले प्रतिवेदन बुझाएपछि स्थायी समिति बैठक बस्ने वातावरण तयार भएको हो ।
कार्यदलको प्रतिवेदनलाई आधार मानेर सहमतिको प्रस्ताव ल्याउने जिम्मा अध्यक्षलाई दिइएकाले सोहीअनुसार एजेन्डा तय गर्न दुवै अध्यक्षबीच छलफल भएको पौडेलले जानकारी दिए ।