- वि.सं २o८१ जेठ १ मंगलबार
अपांगता भएका व्यक्तिहरुको सुविधाका लागि ललितपुर महानगरपालिकाले अपांगतामैत्री क्याब (ट्याक्सी) ल्याउने भएको छ । क्याब सञ्चालनका लागि महानगरपालिका, स्वावलम्बन जीवन पद्धति केन्द्र र स्वावलम्बन जीवन पद्धति केन्द्र, जापानबीच त्रिपक्षीय सम्झौता भएको छ ।
क्याब सञ्चालनमा आएपछि अपांगता भएका व्यक्तिलाई आवतजावत गर्न सहज हुने मेयर चिरिबाबु महर्जनले बताए । ‘तत्काललाई एउटा क्याब सञ्चालन हुन्छ, यसले छोटो दूरीमा अपांगता भएकाहरूको जीवनयापनलाई सहज बनाउन मद्दत पुग्छ,’ मेयर महर्जनले भने ।
सडक र सार्वजनिक सवारीसाधनलगायत अन्य संरचनासमेत अपांगतामैत्री नहुँदा अपांगता भएका व्यक्तिले सास्ती व्यहोर्न बाध्य छन् । महानगरले सञ्चालन गर्न लागेको क्याबमा ह्विलचेयरसहित चढ्न मिल्छ ।
चारवटा ह्विलचेयरमा बसेका अपांगता भएका व्यक्ति र उनीहरूका सहयोगी अट्ने क्षमता यो क्याबको हुने स्वावलम्बन जीवन पद्धति केन्द्रले जनाएको छ ।
सम्झौताअनुसार अपांगतामैत्री यो क्याबको खरिदका लागि महानगरपालिकाले २० लाख, स्वावलम्बन जीवन पद्धति केन्द्र जापानले १५ लाख र स्वावलम्बन जीवन पद्धति केन्द्र ललितपुरले तीन लाख रुपैयाँ खर्च गर्नेछ । चालक, इन्धन, मेन्टिनेन्स खर्च र सवारी करको खर्च महानगरले व्यहोर्नेछ । क्याब सञ्चालन स्वावलम्बन जीवन पद्धति केन्द्रको संयोजनमा हुनेछ ।
