राष्ट्रिय स्वतन्त्र पार्टीका सभापति रवि लामिछानेले देश निर्माणको अभियानमा साथ दिन निजी क्षेत्र र नेपाली डायोस्पोरालाई आह्वान गरेका छन्। बुधबार पार्टीको अभिमुखीकरण कार्यक्रमलाई सम्बोधनका क्रममा उनले नेपालमा लगानीको बढाउन निजी क्षेत्र, नेपाली डायोस्पोरा र विदेशी लगानीकर्तालाई आह्वान गरेका हुन् ।
अब लगानीको सुरक्षा कुनै नेता र पार्टीले नभई नीतिले गर्ने भएकाले ढुक्कसँग लगानी गर्न उनले आग्रह गरेका हुन्।
यस्तो छ लामिछानेको आह्वानः
विदेशका निजी क्षेत्रलाई म आश्वस्त पार्न चाहन्छु कि तपाईंहरू कहीँ कतै पनि विचलित नहुनुहोला। तपाईंहरूले निर्धक्कसँग काम गर्न सक्ने वातावरण हामी बनाउँछौँ। यो देशमा लगानी ल्याउनका निम्ति विदेशमा रहेका नेपाली डायोस्पोराका साथीहरूलाई म यही मञ्चबाट आह्वान गर्न चाहन्छु, आउनुहोस् मिलेर देश बनाऔँ, देश निर्माणको यो महान् अभियानमा तपाईंहरूको साथ हामीलाई चाहिएको छ। सँगै मिलेर हामी थिति बसाल्ने संकल्प गर्न सक्छौँ। अन्तर्राष्ट्रिय समुदायलाई पनि म यती भन्न चाहन्छु कि नेपाल लगानी गर्नका लागि सुरक्षित देश छ, तपाईं र तपाईंको लगानी यो देशमा सुरक्षित हुन्छ। निर्धक्क हुनुहोला। कुनै किसिमको बाधा अड्चन हुनेछैन। तपाईंलाई कुनै अमुक नेता वा पार्टीले संरक्षण गर्नुपर्नेछ, देशको नीतिले संरक्षण गर्नेछ। नीतिगत रूपमा तपाईं–हामी संरक्षित हुनेछौँ।
