चीनको सुरक्षा अवधारणा जिएसआईलाई  समर्थन हुँदैन : कांग्रेस प्रवक्ता महत

सत्तारूढ दल नेपाली कांग्रेसले प्रधानमन्त्री केपी ओलीद्वारा चिनियाँ नेतृत्वलाई ग्लोबल सेक्युरिटी इनिसिएटिभ (जिएसआई)मा दिएको समर्थनलाई स्वीकार नगर्ने स्पष्ट पारेको छ ।

कांग्रेस प्रवक्ता एवं पूर्वपरराष्ट्रमन्त्री डा. प्रकाशशरण महतले चीनले अघि सारेको ग्लोबल सेक्युरिटी इनिसिएटिभ (जिएसआई)लाई समर्थन गर्न नसकिने टिप्पणी गरेका छन् । आइतबार प्रवक्ता महतले नयाँ पत्रिकालाई प्रतिक्रिया दिँदै कुनै पनि मुलुकको सैन्य अवधारणामा नेपालको समर्थन हुन नसक्ने स्पष्ट पारेका छन् । 

शनिबार कांग्रेस उपसभापतिसमेत रहेका सांसद एवं पूर्वउपप्रधानमन्त्री पूर्णबहादुर खड्कालाई साक्षी राखेर प्रधानमन्त्री केपी ओलीले चिनियाँ राष्ट्रपति सी जिनपिङसँग चीनको तियान्जिनमा भएको वार्तामा जिएसआईमा नेपालको समर्थन रहेको बताएका थिए । 

‘चीनसँगको वार्तामा भएको विस्तृत विषयमा मलाई जानकारी छैन । तर, यति कुरा स्पष्ट रूपमा भन्न सक्छु कि नेपालले कुनै पनि देशको सैन्य एवं सुरक्षा अवधारणा वा प्रस्तावलाई समर्थन गर्न वा त्यसमा सामेल हुन सक्दैन । नेपालले जसरी अमेरिकाको हिन्द प्रशान्त रणनीतिलाई समर्थन गरेन, त्यसैगरी चीनको जिएसआईलाई पनि समर्थन गर्न सक्दैन, त्यसमा सामेल भएर सहकार्य गर्ने त प्रश्नै हुँदैन,’ महतले भने ।