द निक्की–आइआइटी रुड्की सहकार्यले नवीकरणीय ऊर्जा विकासलाई टेवा दिने विश्वास

नेपाल–भारत चेम्बर अफ कमर्स एन्ड इन्डस्ट्री (निक्की) र इन्डियन इन्स्टिच्युट अफ टेक्नोलोजी रुड्की (आइआइटी रुड्की)ले सौर्य, ऊर्जा भण्डारण, हरित हाइड्रोजन, माइक्रोग्रिड, क्षमता अभिवृद्धि तालिम तथा उद्योग–शैक्षिक संस्थाबिच सहकार्यका आपसी सहमति भएका अनुसन्धानका क्षेत्रमा सहकार्य गर्न सम्झौतापत्रमा हस्ताक्षर गरेका छन्।

निक्कीका महानिर्देशक केएम सिंह र आइआइटी रुड्कीका डिन प्रा. विवेककुमार मलिकले आफ्ना–आफ्ना संस्थाको तर्फबाट सम्झौतामा हस्ताक्षर गरेका हुन्। सम्झौताअनुसार, एसियाकै पुरानो इन्जिनियरिङ कलेज इन्डियन इन्स्टिच्युट अफ टेक्नोलोजी रुड्कीले आफ्नो सस्टेनेबल एनर्जी सेन्टरमार्फत निक्कीका सदस्यहरूलाई अध्ययन, अध्यापन तथा कार्यशालामा सहभागिता गराउनेछ।

यस्तै, निक्कीले सम्भावित विद्यार्थीहरूलाई नवप्रवर्तनशील प्रविधितर्फ आकर्षित गर्न आइआइटी रुड्कीमा ह्याकाथन र प्रदर्शनीहरू आयोजना गर्न सहयोग गर्नेछ। यस्ता कार्यक्रमहरू समयानुकूल र आपसी सहमतिअनुसार आयोजना गरिनेछन्।

सम्झौता हस्ताक्षरपछि निक्कीका अध्यक्ष सुनील केसीले भने, ‘आगामी दिनमा निक्कीका लागि अझै बलिया र भरपर्दा साझेदारहरूको आवश्यकता छ। उद्योग र शैक्षिक क्षेत्रबीचको खाडललाई निक्कीले देशभित्र तथा विश्वकै उत्कृष्ट संस्थाहरूसँग सहकार्य गरेर पुलको काम गरिरहेको छ।’ उनले थपे, ‘निक्की–आइआइटी रुड्की सहकार्यले नेपालको गेम–चेञ्जर ऊर्जा क्षेत्रमा पनि ठुलो टेवा पुर्‍याउनेछ। यो सहकार्यले नवीकरणीय ऊर्जा विकासलाई पनि अघि बढाउनेछ। लगानी बढेसँगै दक्ष जनशक्तिको आवश्यकता पर्ने हुनाले यस सहकार्यले नेपालको आर्थिक वृद्धिमा पनि योगदान पुर्‍याउनेछ ।’

द्विराष्ट्रिय चेम्बर निक्कीले नेपाल र भारतका सरकारी तथा गैरसरकारी निकायहरूसँग काम गर्दै दुवै देशका उद्यमी र प्रमुख सरोकारवालाहरूलाई जोड्ने काम गर्दछ। यसले रणनीतिक साझेदारी र उपक्रमहरूको स्थापना तथा निरन्तरतामा सहयोग पुर्‍याउँछ।

त्यसैगरी, आइआइटी रुड्कीले आफ्नो संकाय तथा प्रयोगशालामा रहेका शैक्षिक तथा अनुसन्धान र विकास स्रोतलाई उद्योग तथा अन्य प्रयोगकर्ताहरूसँगको परियोजना सम्झौताअनुसार परिणाम विकास र वितरणमा प्रयोग गर्दछ। सम्झौताअनुसार निक्की र आइआइटी रुड्कीबिचको सम्बन्ध दुवै संस्थाका लागि लाभदायी हुने बताइएको छ।

सन् १८४७ मा रुड्की कलेजका रूपमा सुरु भएको आइआइटी रुड्की एसियाको पहिलो इन्जिनियरिङ कलेज हो। नेपालका पहिलो पुस्ताका अधिकांश इन्जिनियरहरू पनि यही संस्थाबाट शिक्षित भएका छन्। भारतको प्रविधिगत विकास, औद्योगिक वृद्धिदेखि पूर्वाधार, जलस्रोत, ऊर्जा र दिगोपनासम्बन्धी नीतिनिर्माणसम्ममा आइआइटी रुड्कीले महत्त्वपूर्ण भूमिका खेलेको छ।