छुट्टाछुट्टै सवारी दुर्घटनामा एकजनाको मृत्यु, तीनजना गम्भीर घाइते

मकवानपुर र चितवनमा भएका छुट्टाछुट्टै सवारी दुर्घटनामा एकजना चिकित्सकको मृत्यु भएको छ भने तीनजना गम्भिर घाइते भएका छन्। बागमती प्रदेश प्रहरी कार्यलयले हेटौँडाले दिएको जानकारी अनुसार चितवानमा भएको कार दुर्घटनामा चिकित्सकको मृत्यु भएको हो।शुक्रबार राति भरतपुर महानगरपालिका वडा नम्बर १०, बिशालचोकमा भएको कार दुुर्घटनामा भरतपुर महानगरपालिका–२, आँपटारी बस्ने २८/२९ वर्षीय डा. बिप्लब भट्ट गम्भीर घाइते भएका थिए । उनको उपचारको क्रममा पुरानो मेडिकल कलेज भरतपुरमा मृत्यु भएको हो ।

डा.भट्टले चलाएको बा १५ च ४६९३ नम्बरको कार रमाइलोचोकबाट बिशालचोकतर्फ जाने क्रममा आफैं अनियन्त्रित भई सडक किनारमा रहेको रुखमा ठोक्किएको थियो । उनको उपचारको क्रमम आज विहान २ बजेतिर मृत्यु भएको अस्पतालले जनाएको बागमती प्रदेश प्रहरी कार्यालयका प्रवक्ता प्रहरी उपरीक्षक ढकेन्द्र खतिवडाले जानकारी दिए।यस्तै पूर्वी मकवानपुरको बकैया गाउँपालिका–५, सिमातपुलमा मदन भण्डारी लोक मार्गअन्तर्गत सिन्धुलीबाट हेटौँडा तर्फ आउँदै गरेको ज १३ प २०४४ नम्बरको मोटरसाइकललाई विपरीत दिशाबाट श्रीपुर हुँदै जुरेली जाँदै गरेको ना ७ त ५०७२ नम्बरको ट्याक्टरले ठक्कर दिँदा दुईजना गम्भिर घाइते भएका छन्।

प्रहरीका अनुसार दुर्घटनामा मोटरसाइकल चालक सिन्धुली कमलामाई नगरपालिका–६ का ३० वर्षीय धनकुमार आले मगर र पछाडि सवार सोही स्थानका २५ वर्षीय रगुन खत्री गम्भीर घाइते भएका हुन् । उनीहरुको मकवानपुर सहकारी अस्पताल हेटौँडामा उपचार भइरहेको छ ।

यस्तै पूर्व–पश्चिम राजमार्ग अन्तर्गत हेटौँडा उपमहानगरपालिका–३ बसामाडीमा ट्रकले ठक्कर दिँदा एक जना पैदल यात्री गम्भीर घाइते भएका छन् । प्रहरीका अनुसार हेटौँडाबाट चितवनतर्फ जाँदै गरेको बा.प्र. ०३–००१ ख ०६११ नम्बरको ट्रकले ठक्कर दिँदा मकवानपुर बागमती गाउँपालिका–६ का ३२ वर्षीय सुजन आले घाइते भएका हुन् । आलेको टाउको र कम्मरमा चोट लागेको छ । उनको गम्भीर अवस्थामा अहिले हेटौँडा ११ स्थित चुरेहिल अस्पतालमा उपचार भइरहेको बागमती प्रदेश प्रहरी कार्यालयका प्रवक्ता खतिवडाले जानकारी बताए ।