- वि.सं २o८२ जेठ ११ आइतबार
नारायणी नदीमा माछा मार्न गएका नवलपुरको गैँडाकोट नगरपालिका- ७ निवासी ४० वर्षीय यमलाल दराई मृत फेला परेका छन् । जिल्ला प्रहरी कार्यालय नवलपुरका अनुसार शुक्रबार राति दुईजना साथीसँग गैँडाकोट- ९ थुम्सीस्थित नारायणी नदीमा माछा मार्न गएका थिए ।
माछा मार्न गएका दराई नदीले बगाई शुक्रबार राति नै बेपत्ता भएका थिए । उनको खोजी गर्ने क्रममा आइतबार बिहान ९ बजेतिर थुम्सीनजिकै नारायणी नदी किनारमा शव फेला परेको हो ।
उनको शव आवश्यक मुचुल्का तयार पारी पोस्टमार्टमका लागि भरतपुर अस्पताल पठाइएको इलाका प्रहरी कार्यालय गैँडाकोटले जनाएको छ । घटनाको अनुसन्धान भइरहेको प्रहरीले जनाएको छ । उनीसँग माछा मार्न गएका अन्य साथीहरू भने सुरक्षित रहेका छन् ।
