- वि.सं २o८१ चैत २० बुधबार
राप्रपा वरिष्ठ नेता एवं रुपन्देही ३ का सांसद दीपक बोहराको ७४ वर्षको उमेरमा निधन भएको छ । लामो समयदेखि घाँटीको समस्यासँग जुधिरहेका उनको मंगलबार काठमाडौंस्थित ओम अस्पतालमा निधन भएको हो । घाँटीको समस्याका कारण नबोलेरै चुनाव जितेका बोहरा प्रतिनिधिसभामा पनि बोल्न सकेनन् । संसद् बैठकमा नबोली उनको निधन भएको छ ।
बोहराको पार्थिव शरीरमा राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापासहित दुवै पार्टीका शीर्ष नेता र कार्यकर्ताले श्रद्धाञ्जली दिएका थिए । श्रद्धाञ्जलीपछि हेलिकोप्टरबाट शव काठमाडौं पुर्याइएको राप्रपा रुपन्देहीका उपाध्यक्ष अजयकुमार गुप्ताले जानकारी दिए । बोहराको पार्थिव शरीरलाई मंगलबार दिउँसो भैरहवा ल्याइएको थियो । उनको पार्थीव शरीर गौतमबुद्ध विमानस्थलदेखि गल्लामन्डी, मिलनचोक, नारायणस्थान, बर्मेलीटोली, बुद्धचोक, नयाँ सडक, देवकोटाचोक, बैंकरोडलगायत स्थान परिक्रमा गराई सिद्धार्थनगर– ३ स्थित राप्रपा कार्यालयमा श्रद्धाञ्जलीका लागि राखिएको थियो ।
बोहरालाई अन्तिम श्रद्धाञ्जली दिन राप्रपाका नेता–कार्यकर्ता, स्थानीय बासिन्दा, कांग्रेस, एमाले, माओवादी, एकीकृत समाजवादी, जसपा, लोसपा, जनमत पार्टीका प्रदेश र जिल्लास्तरका नेता, प्रदेश सभा सदस्य, स्थानीय तहका जनप्रतिनिधि, सुरक्षा निकायका प्रमुख भैरहवास्थित पार्टी कार्यालयमा पुगेका थिए ।
०७७ जेठमा कोरोना भाइरसबाट संक्रमित भएपछि उनको घाँटीमा समस्या देखिएको थियो । स्वरमा परिवर्तन र समस्या देखिएकाले उनी चुनावी प्रचारप्रसारकै क्रममा समेत बोल्न नसक्ने अवस्थामा थिए । भारतको नयाँदिल्ली र अमेरिकाको न्युयोर्कमा समेत उपचार गराएका उनले पछिल्लो समय घरमा स्पिच थेरापी लिँदै आएका थिए ।
बोहराको निधनप्रति रुपन्देहीका विभिन्न संघसंस्थाले विज्ञप्ति जारी गरी दुःख व्यक्त गरेका छन् । बोहरा नेपालको राजनीतिमा झन्डै चार दशकदेखि राप्रपामा क्रियाशील रहँदै आएका थिए । ०३६ मा रुपन्देहीबाट राष्ट्रिय पञ्चायत सदस्यमा निर्वाचित उनी ०४२ को राष्ट्रिय पञ्चायत सदस्यमा समेत विजयी भएका थिए । उनी ०७० मा रुपन्देही २ बाट संविधानसभा सदस्यमा निर्वाचित भएका थिए । बोहराले ०७९ को निर्वाचनमा रुपन्देही ३ मा तत्कालीन गृहमन्त्री एवं कांग्रेस नेता बालकृष्ण खाणलाई पराजित गरेका थिए । निर्वाचनकै समयदेखि बिरामी रहेका उनले निर्वाचनको प्रचारप्रसारमा पनि एक शब्द नबोली तत्कालीन खाणलाई पराजित गरेका थिए ।
राप्रपाको मंगलबार बसेको आकस्मिक बैठकले बोहराको सम्मानमा तीन दिन पार्टीको झन्डा आधा झुकाउन निर्णय गरेको प्रवक्ता मोहनकुमार श्रेष्ठले बताए । राप्रपा अध्यक्ष लिङ्देनले बोहराको निधनबाट राप्रपा र राष्ट्रवादी आन्दोलनलाई अपूरणीय क्षति पुगेको बताए । बोहरा राप्रपा नेपालका अध्यक्ष कमल थापानिकट थिए । स्वर्गीय बोहराको अन्तिम संस्कार बुधबार पशुपति आर्यघाटमा हुँदैछ ।
